номаҳо
Дастгирӣ намудем, инак, ҷавоб!
Номаи Ҳайдари Рустам, собиқ омӯзгори мактаби таҳсилоти миёнаи умумии рақами 6-ро, ки бо номи "Мо интизори ҷавоб ва дастгирием" (Ҷумҳурият", 21 июли 2012) ба табъ расида буд, мақомоти иҷроияи маҳаллии ҳокимияти давлатии ноҳия мавриди баррасӣ қарор дод. Муаллиф бо хоҳиши худаш аз 1 июли соли 2011, дар синни 58, тибқи моддаи 60 Қонуни Ҷумҳурии Тоҷикистон "Дар бораи таъиноти нафақаи шаҳрвандони Ҷумҳурии Тоҷикистон" ба нафақаи имтиёзнок баромада буд. Маблағӣ нафақаи ӯ 340 сомонию 38 дирамро ташкил дод.
Муаллиф изҳор доштааст, ки "…он маблағи ками нафақа ба рӯзгораш намерасад, аммо ӯ дар ин ҳол дигар ҳатто имтиёзҳои як омӯзгореро, ки рӯзи аввал ба фаъолият шурӯъ кардааст, надорад".
Дар ноҳияи Ванҷ вобаста ба шароиту имкониятҳо ба ҳамаи омӯзгорон имтиёзҳо муқаррар гардидаанд ва аз он баҳравар шудаанд. Аз ҷумла, ба собиқ омӯзгор Ҳайдари Рустам аз 7 январи соли гузашта 1,35 га замини корам, 0,6 га боғ ва 3,45 га замин барои истифодаи дигар корҳо ба меросии якумра дода шуд. Ин барои гузаронидани рӯзгори хонаводагияш басанда аст.
Мақомоти иҷроия ба ҳангоми гузаронидани тамоми чорабиниҳои ҷашнӣ ҳамаи собиқадорони ҷангу меҳнат, шахсони маъруфу барӯманд ва фаъолони ноҳияро даъват менамояд ва ба онҳо ёрии моддӣ мерасонад.
Амрихудои ДАМДОР,
раиси ноҳияи Ванҷи Вилояти Мухтори
Кӯҳистони Бадахшон
Баёни ақида (0) Санаи нашр: 25.08.12 №: 110 Мутолиа карданд: 4990
