сафарҳо
Тавофуқоти Тоҷикистону Туркманистон дар соҳаҳои саноат, нақлиёт ва тиҷорат
24 август дар доираи сафари расмии Эмомалӣ Раҳмон, Президенти Ҷумҳурии Тоҷикистон, ба Туркманистон миёни КВД «Ширкати алюминийи тоҷик Талко» ва Корхонаи коркарди нафти «Туркманбошӣ» созишномаи ҳамкорӣ ба имзо расид, ки мутобиқи он ҳамасола дар ҳаҷми 35 ҳазор тонна кокси нафтӣ бо нархҳои имтиёз- дор ба Талко ҷудо карда мешавад.
Ҳамчунин мутобиқи супориши сарони давлатҳо ба сохторҳои масъули ду кишвар тарифҳои транзитии роҳи оҳани Туркманистон барои боркашонии Талко бояд сабук карда шаванд.
Тавре ки зикр гардид, ба туфайли ҳамкории Талко бо корхонаҳои саноатии Туркманистон ҳаҷми содироти маҳсулоти Тоҷикистон ба ин кишвар дар нимсолаи якуми соли равон нисбат ба ҳамин давраи соли гузашта 240 дарсад афзун гардидааст.
Худи ҳамон рӯз Эмомалӣ Раҳмон, Президенти Ҷумҳурии Тоҷикистон, ба шаҳри Ободони Туркманистон ташриф оварда, ҳамроҳ бо Гурбонгулӣ Бердимуҳаммадов, Президенти Туркманистон, дар ифтитоҳи навбати дуюми як корхонаи бузурги ресандагӣ иштирок намуд.
Дар ду навбати ин корхона, ки солона аз 6650 тонна нахи пахта то 4870 тонна ришта истеҳсол мекунад, наздик ба 1200 нафар бо кори доимӣ таъмин гардидааст.
Зимни шиносоӣ бо кори корхона ва боздид аз намоишгоҳи маҳсулоти саноати сабуки шаҳри Ободон, аз ҷумла зикр гардид, ки тамоми пахтаи дар Туркманистон истеҳсолшаванда дар дохили кишвар коркард мешавад ва наздики 90 дарсади маҳсулоти тайёри саноати нассоҷӣ ба хориҷа содир мегардад.
Аз ин ҷо - Эмомалӣ Раҳмон, Президенти Ҷумҳурии Тоҷикистон ва Гурбонгулӣ Бердимуҳаммадов, Президенти Туркманистон, ба шаҳри Руҳобод ташриф оварда, дар маҷмааи байналмилалии варзиши аспӣ бо дастовардҳои варзишгарони аспсавори туркман аз наздик шинос шуданд.
Ин маҷмаа аз сирки аспсаворон, толори паридани аспҳои хушхиром аз болои монеаҳои баланд, майдони бузурги пойгаҳ ва намоишгоҳи навъҳои хушзоти ин ҷонварони зебою нозуктабиат иборат аст. Бештари аспҳое, ки зебоиву малакаи онҳоро чобуксаворони варзида ба намоиш гузоштанд, мутааллиқ ба зоти «Ахалтегин» буданд.
Баёни ақида (0) Санаи нашр: 28.08.12 №: 111 Мутолиа карданд: 2198
