сафарҳо
Боздид аз шаҳри Габалаи Озарбойҷон
14 октябр боздиди кории Эмомалӣ Раҳмон, Президенти Ҷумҳурии Тоҷикистон, аз Ҷумҳурии Озарбойҷон аз шаҳри Габала оғоз ёфт. Дар шаҳри Габалаи Озарбойҷон Сарвари давлати Тоҷикистон нахуст аз маҷмааи саноатии корхонаҳои коркарди меваю сабзавоти «Jale» ва осорхонаи Ҳайдар Алиев дидан кард.
Дар маҷмааи саноатии «Jale» Эмомалӣ Раҳмон, Президенти Тоҷикистон, бо истифодаи технологияи навтарини коркарди меваю сабзавот ва таҷрибаи соҳибкорони пешқадами хусусӣ аз наздик шинос шуда, доир ба роҳҳои ташкил ва густариши ҳамкорӣ дар ин ва дигар самтҳои фоидабахш гуфтугӯи судманд анҷом дод.
Тавре зикр гардид, ин маҷмаа бо харҷи 50 миллион евро бунёд ёфтааст ва дар он беш аз 3 ҳазор нафар кор мекунад. Дар ин ҷо асосан афшураи табиии меваю сабзавот омода ва бастбандӣ мешавад.
Дар коргоҳи дигари ин маҷмаа ба меҳмони олимақом ва ҳайати ҳамроҳи ӯ технологияи навтарини нигаҳдории меваю сабзавот дар сардхонаҳо намоиш дода шуд. Чунонки зикр гардид, навъҳои гуногуни мева дар ҳарорати аз 0 то +5 дараҷа ба муҳлати то як сол беосеб нигаҳ дошта мешавад.
Дар «Маркази Ҳайдар Алиев» бошад, Эмомалӣ Раҳмон, Сарвари давлати Тоҷикистон, аз намоишгоҳи аксҳои собиқ Президенти Озарбойҷон, пешвои умумимиллии ин кишвар Ҳайдар Алиев дидан кард.
Дар ин ҷо аксҳои ин шахсияти маъруфи таърихӣ аз овони кӯдакӣ то мактабхонию донишҷӯӣ ва фаъолияти ӯ дар идораҳои гуногуни собиқ давлати шӯравӣ ва роҳбариаш дар Озарбойҷони соҳибистиқлол ба намоиш гузошта шудааст. Тавре зикр гардид, мардуми Озарбойҷон ба хизматҳои шоёни Ҳайдар Алиев ҳам дар солҳои ҳокимияти шӯравӣ, ҳам дар солҳои вазнини пеш аз истиқлолият ба даст овардани ин ҷумҳурӣ ва ҳам дар даврони рушди мустақили давлат арҷгузорӣ карда, аз ӯ ба унвони наҷотбахши миллати Озарбойҷон ёдовар мешаванд.
Баёни ақида (0) Санаи нашр: 18.10.12 №: 133-134 Мутолиа карданд: 1999
