мулоқотҳо
Душанбе шаҳри бехатар мешавад
21 декабр Президенти Ҷумҳурии Тоҷикистон Эмомалӣ Раҳмон ноиби президенти ширкати «Ҳуавей»-и Ҷумҳурии Мардумии Чин Ами Линро ба ҳузур пазируфт.
Дар мулоқот, ки бо иштироки масъулини дахлдор аз ҷониби Тоҷикистон ҷараён гирифт, ҷанбаҳои техникию молиявии лоиҳаи "Шаҳри бехатар" баррасӣ шуданд.
Тавре зикр гардид, тибқи ин лоиҳа дар ҳамаи чорроҳаҳо ва кӯчаю хиёбонҳои шаҳри Душанбе камераҳои наворбардорӣ ва аксгирӣ гузошта мешаванд, то ки бехатарии ҳаракат дар роҳҳо ба таври автоматӣ аз тариқи дастгоҳҳои электронӣ назорат карда шавад.
Тавассути камера ва таҷҳизоти аксбардорӣ на танҳо ҳаракат дар роҳҳо, балки тартиботи ҷамъиятӣ низ назорат мегардад. Бо татбиқи босамари ин лоиҳа, ҳамчунин мубориза бо ҷинояткорӣ, аз ҷумла коррупсия, саҳл гардида, як қадами муҳим дар роҳи гузаштан ба ҳукумати электронӣ гузошта мешавад.
Ин лоиҳа бо харҷи 22 миллион доллари амрикоӣ, ки қисмати зиёдаш қарзи имтиёзноки Ҷумҳурии Мардумии Чин тавассути Созмони ҳамкории Шанхай мебошад, дар зарфи 7 моҳ амалӣ гардида, 5 сол муҳлати кафолат дорад. Дар доираи ҳамин лоиҳа аз ҷониби ширкати «Ҳуавей» мутахассисони тоҷик барои кор бо ин таҷҳизоти муосири электронӣ омӯзонда мешаванд.
Истифодаи босамари ин технология дар роҳҳои шаҳри Душанбе имкон медиҳад, ки хароҷоти лоиҳа дар зарфи 6 сол барзиёд баргардонда шавад.
Сарвари давлат Эмомалӣ Раҳмон таъкид дошт, ки лоиҳа бо сифати баланд ва бо истифода аз навтарин технологияи соҳа амалӣ гардад. Ҳамчунин таъкид гардид, ки дар сурати босифат ва самарабахш амалӣ гаштани лоиҳа ин кор дар шаҳру ноҳияҳои дигар низ сурат мегирад.
Баёни ақида (0) Санаи нашр: 27.12.12 №: 156 Мутолиа карданд: 2380
