сафарҳо
Ҳузури Президент Хонаи кӯдаконро мунаввар сохт
26 декабри соли 2012 Президенти кишвар Эмомалӣ Раҳмон ба Хонаи кӯдакони бепарастори шаҳри Турсунзода ташриф оварда, бо шароити зисту таълими онҳо бевосита шинос шуд.
Тавре иттилоъ дода шуд, дар ин ҷо аз соли 1959-ум мактаб-интернати шаҳри Турсунзода фаъолият дорад. Соли 1993 қисмате аз он ба Хонаи кӯдакони бепарастор табдил дода шуда, 2 бинои таълимиаш ба ихтиёри мактаби рақами 2 гузаштааст. Вале Хонаи кӯдакони бепарастор солҳои охир аз нигоҳубини нокифоя ба ҳолати ногувор гирифтор шуда буд.
Аз ин хотир дар пайравӣ ба сиёсати бунёдкорию созандагии Президенти кишвар Эмомалӣ Раҳмон моҳи майи соли 2012 роҳбарияти шаҳри Турсунзода ҳамроҳ бо соҳибкорони саховатманди маҳаллӣ ба тармиму навсозии он пардохта, дар муддати кӯтоҳ аз нав ободу зебояш намуданд.
Ҳамин тариқ, бо саъю кӯшиши даст- ҷамъона ё худ тавассути шарикии босамари давлат ва бахши хусусӣ бинои асосии Хонаи кӯдакон, ки иборат аз 50 ҳуҷра мебошад, пурра тармиму навсозӣ шуд.
Сарвари давлат Эмомалӣ Раҳмон ба сифати кори бинокорон баҳои хуб дода, бо тарбиятгирандагони Хонаи кӯдакон суҳбат намуд.
Тавре аён гардид, тамоми ҳуҷраҳо бо асбобу анҷоми таълимӣ ва истироҳату фароғат, аз ҷумла мизу курсӣ, компютер, тахтаи синфӣ, рахти хоб, роҳаткурсиҳо, ҷевони либос, телевизор ва ғайра муҷаҳҳаз шудааст. Утоқҳои санитарӣ бо ҷойи шустушӯй ва ташноб низ дар дохил буда, бино тавассути шабакаи ягона ва мустақили гармидиҳӣ гарм карда мешавад.
Танҳо барои шабакаи гармидиҳӣ, ки технологияи олмонӣ аст, наздики 300 ҳазор сомонӣ сарф гардидааст. Ҳамагӣ дар навсозии бино беш аз 2 миллион сомонӣ маблағ харҷ шудааст.
Ҳамин тариқ, шабакаи обу корез низ навсозӣ шудааст, ки солҳои зиёд боз хизмат хоҳад кард.
Дар Хонаи кӯдакони шаҳри Турсунзода ба 173 нафар кӯдакони ятиму бепарастор ва аз оилаҳои камбизоат 31 нафар омӯзгор таълим медиҳад, ки 57 нафар духтар ва 116 нафар писар мебошад. 7 нафари онҳо ятимони бепадару модар, 57 кас бепадар, 19 нафар бемодар ва боқӣ аз оилаҳои камбизоату бемор ва волидони ҳабсшуда мебошанд.
Тарбиятгирандагони синни мактабӣ дар 4 мактаби атрофи ин муассиса дарс хонда, дар хонаи умумиашон истиқомати доимӣ доранд. Ду нафар аз тарбиятгирифтагони Хонаи кӯдакон, ки яке духтару дигарӣ писар аст, имрӯз дар омӯзишгоҳҳои касбӣ таҳсили илм ва ҳамзамон дар ин ҷо кор мекунанд.
Сарвари давлат, Эмомалӣ Раҳмон, ба ин Хонаи кӯдакони бепарастор як зумра таҷҳизоти зарурии таълимӣ ва ашёи рӯзгор, аз қабили компютерҳо, телевизорҳо, мошинҳои ҷомашӯӣ ва ба ҳар як тарбиятгиранда велосипед, ҳар гуна бозичаҳои кӯдакона ва ширинию хӯрокворӣ тақдим намуда, ҳамаи онҳоро бо арафаи соли нави мелодии 2013 табрику таҳният гуфт.
Ба ҳар як тарбиятгирандаи Хонаи кӯдакони бепарастор либосҳои зимистонаи гарму шинам дода шуд, ки туҳфаи шахсии Президенти кишвар Эмомалӣ Раҳмон мебошад.
Дар толори Хонаи кӯдакон тарбиятгирандагони ин муассиса ҳунари шеъру сурудхонӣ ва рақсу дилхушии худро намоиш доданд.
Президенти кишвар Эмомалӣ Раҳмон баъди шиносоӣ бо Хонаи кӯдакон ва суҳбати бевосита бо омӯзгорону тарбиятгирандагони он ба масъулин барои боз ҳам ободу зебо ва ба талаботи рӯз мутобиқ намудани шароити он дастуру супоришҳои мушаххас дод. Аз ҷумла дастур дода шуд, дар ҳудуди ҳамин муассиса, ки дар майдони 3 га ҷой гирифтааст, дар давоми 2 сол барои 640 хонанда мактаб-интернат барои хонандагони ятиму бепарастор бо тамоми шароити муосири таълимӣ ва будубош бунёд ёбад.
Баёни ақида (0) Санаи нашр: 1.01.13 №: 1-2 Мутолиа карданд: 2114
