маориф
Маркази омӯзиши малакаҳои амалӣ таъсис ёфт
Убайдулло Қурбонов, ректори Донишгоҳи давлатии тиббии Тоҷикистон, зикр кард, ки мавриди амал қарор гирифтани "Барномаи рушди Донишгоҳи давлатии тиббии Тоҷикистон ба номи Абуалӣ ибни Сино барои солҳои 2006-2015" марҳалаи сифатан нави рушди донишгоҳ мебошад, ки тавассути он донишгоҳ солҳои охир ба дастовардҳои назаррас ноил гардид.
Назар ба гуфтаи ӯ, аз оғози соли таҳсили 2012-13 донишгоҳ тибқи барномаи мазкур ба ислоҳоти таҳсилоти олии тиббӣ пардохт, ки он ба талаботи меъёри байналмилалӣ наздик аст. Ба ин мақсад чанд нафар устоди клиникии донишгоҳ дар муассисаҳои таҳсилоти хориҷӣ курсҳои бозомӯзӣ ва такмили ихтисосро хатм кард. Ҳамчунин мутахассисони варзида аз Канада ва Швейтсария барои ҷорӣ намудани таҷрибаи пешқадам ба донишгоҳ даъват шуданд.
Соли гузашта бо ташаббуси раёсати донишгоҳ ва дастгирии молиявии Дафтари швейтсариягии рушду ҳамкорӣ бори нахуст Маркази омӯзиши малакаҳои амалӣ таъсис дода шуд. Он бо навтарин воситаҳои амалии таълим муҷаҳҳаз гардида, барои ташаккул ва рушди маҳорати клиникии донишҷӯён мусоидат мекунад. Зикр гардид, ки беш аз 30 таълифоти илмии донишҷӯён ва олимони ҷавони донишгоҳ дар конфронсҳои хориҷи кишвар сабт шуд.
Ба табъ расидани "Энсиклопедияи мухтасари тиб" ва китоби "Андарзнома дар бораи тиб ва табиб" аз дастовардҳои дигари донишгоҳ маҳсуб меёбад.
Ректори донишгоҳ таъмини пураи шаффофиятро дар баргузории маъракаи қабули довталабон яке аз омилҳои баланд бардоштани сатҳу сифати таълиму тарбия арзёбӣ кард.
Мунаввари САФАР
Баёни ақида (0) Санаи нашр: 19.01.13 №: 13 Мутолиа карданд: 5762
