мулоқотҳо
Ҳашт локомотиви нав вориди
Тоҷикистон мешавад
Корхонаи воҳиди давлатии «Роҳи оҳани Тоҷикистон» аз Ҷумҳурии Қазоқистон 8 локомотиви нав харид мекунад.
Дар ин бора Аскар Мамин, президенти Ҷамъияти саҳомии Ширкати миллии Роҳи оҳани Қазоқистон, ки баъд аз мулоқот бо Эмомалӣ Раҳмон, Президенти Ҷумҳурии Тоҷикистон, дар ҳузури хабарнигорон суҳбат мекард, иттилоъ дод. Бино ба гуфтаи ӯ, дар ин робита миёни ниҳодҳои дахлдор қарордоди лозим ба тасвиб расидааст.
Хадамоти матбуоти Президенти Ҷумҳурии Тоҷикистон бо тасдиқи ин хабар гузориш медиҳад, ки дар мулоқот таваҷҷуҳи асосӣ ба навсозии техникаю таҷҳизоти КВД «Роҳи оҳани Тоҷикистон», омодасозии кадрҳои баландихтисоси соҳа ва такмили ихтисоси онҳо зоҳир гардид. Бино ба иттилои манбаъ, баррасии ҳаракати бемонеаи қаторҳои Тоҷикистон дар роҳи оҳани Қазоқистон, таъмини бехатарӣ ва тартиботи ҳуқуқӣ дар масири ҳаракат низ аз мавзӯъҳои меҳварӣ будааст.
Дар ҳамин ҳол, Аскар Мамин зимни суҳбат бо хабарнигорон аз сатҳи кунунии ҳамкориҳои Тоҷикистону Қазоқистон изҳори қаноатмандӣ намуда, ба рушди робитаҳои минбаъда таъкид кард. Ӯ изҳор дошт, ки дар суҳбат бо Президенти Ҷумҳурии Тоҷикистон ҳамчунин масъалаи навсозии фаннии таҷҳизоти КВД «Роҳи оҳани Тоҷикистон» ва омода намудани мутахассисони касбӣ мавриди баррасӣ қарор гирифт.
Бояд гуфт, ки аслан қаторҳои Тоҷикистон дар хати ҳаракат ба Федератсияи Русия аз қаламрави Қазоқистон убур мекунанд ва то кунун КВД «Роҳи оҳани Тоҷикистон» аз ин кишвар 4 адад локомотиви нав дастрас намудааст. Президенти Ҷамъияти саҳҳомии Ширкати миллии Роҳи оҳани Қазоқистон итминон дод, ки таҷҳизоту техникаи воридшуда аз ин кишвар зарфияти хуб дошта, ба талаботҳои замони муосир ҷавобгӯ аст.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 20.04.13 №: 56 Мутолиа карданд: 2401
