номаҳо
Андешаҳои муаллиф қисман дурустанд
(Ҷавоб ба мақолаи "Зафаробод кай бо об таъмин мегардад?", рӯзномаи "Ҷумҳурият", аз 12 феврали соли 2013, №20)
Мақолаи Ҷовиди Аштӣ "Зафаробод кай бо об таъмин мегардад?" дар маҷлиси васеи мақомоти иҷроияи ҳокимияти давлатии ноҳия мавриди баррасӣ қарор гирифт ва аз рӯи он тадбирҳо андешида шуданд.
Бояд гуфт, ки андешаҳои муаллиф перомуни нарасидани оби полезӣ дар хоҷагиҳои кишоварзии ноҳия қисман дурустанд. Солҳои пешин дар ҳақиқат дар ноҳияи Зафаробод ҳолатҳои танқисии оби полезӣ ба мушоҳида мерасид. Зеро пойгоҳҳои обкашӣ ҳанӯз солҳои 60-уми қарни гузашта сохта шуда, бо мурури солҳо куҳнаю корношоям гаштаанд.
Мақомоти иҷроияи маҳаллии ҳокимияти давлатии ноҳия ба мақсади соли равон бо оби полезӣ пурра таъмин намудани хоҷагиҳои кишоварзӣ пайваста тадбирҳои мушаххас меандешад.
Ба ин мақсад 10,3 миллион сомонӣ маблағ ҷудо карда шуд. Ба ибтикори корхонаи масъулияташ маҳдуди "Илҳом-2", ки дар тендер ғолиб омад, як адад муҳаррики баландшиддати 8 - ҳазоркиловатта, як миқдор қисмҳои эҳтиётӣ барои дастгоҳҳои обкашӣ ва барқӣ харида шуданд.
Дар як вақт зеристгоҳи барқии 110-киловатта дар пойгоҳи обкашии "Мирзочӯл-3", ки солҳои тӯлонӣ аз сабаби носозӣ бекор мехобид, пурра барқарор карда шуд.
Бояд гуфт, ки дар мавсими имсолаи обёрӣ хоҷагиҳои кишоварзии ноҳия бо оби полезӣ пурра таъмин шудаанд. Ҳамаи муҳаррикҳои пойгоҳҳои обкашӣ бо тамоми иқтидор кор мекунанд. Кормандони пойгоҳҳои обкашии «Мирзочӯл - 3» баҳри он мекӯшанд, ки хоҷагиҳои ноҳияро то охири мавсим бо оби полезӣ таъмин намоянд.
Р.АШУРОВ,
муовини якуми раиси ноҳияи Зафаробод
Баёни ақида (0) Санаи нашр: 25.05.13 №: 72-73 Мутолиа карданд: 5281
