маориф
Низоми кредитӣ роҳандозӣ шуд
Абдуқаҳҳор Турсунов, муовини аввали ректори Донишгоҳи техникии Тоҷикистон ба номи М. Осимӣ, ба хабарнигорон гуфт, ки аз аввали соли таҳсил донишгоҳ пура ба низоми кредитии таҳсил гузашт. Ин шакли таҳсил бори аввал дар факултаи соҳибкорӣ - муҳандисӣ ва мудирия ҷорӣ гардид.
Фаъолияти камтар аз яксола нишон дод, ки дар сурати дуруст истифода шудани имкониятҳои низоми кредитии таҳсил, сатҳу сифати таълим, махсусан фаъолияти мустақилонаи донишҷӯён беҳтар хоҳад шуд. Дар баробари ин, истифодаи технологияи компютерӣ, таҳияи барномаҳои идорасозӣ имкон медиҳад, ки савияи донишандӯзии донишҷӯён холисона баҳогузорӣ шавад.
Донишгоҳ бо зиёда аз 80 муассисаи таҳсилоти олӣ ва марказҳои илмию таълимии хориҷӣ шартномаи ҳамкориҳои дуҷониба дошта, аъзои зиёда аз 10 ассотсиатсия ва созмонҳои байналмилалии донишгоҳҳои минтақа ва ҷаҳон мебошад. Дар ҳамкорӣ бо Донишгоҳи миллии техникии Беларус ва Баумани Маскав факултаи муштараки муҳандисӣ - техникӣ таъсис ёфт.
- Ҳарчанд идораву корхонаҳои гуногун ба кадрҳои донишгоҳ таваҷҷуҳ зоҳир намоянд ҳам, масъалаи бо ҷойи кор таъмин намудани хатмкардагон қаноатбахш нест,- гуфт Абдуқаҳҳор Турсунов. - Роҳбарияти донишгоҳ ҷиҳати ба роҳ мондани робита бо вазорату идора ва корхонаҳои истеҳсолӣ ва ба ин васила ҳалли масъалаи мазкур чораҳои мушаххас андешида истодааст.
Шаҳнози ҚУРБОН
Баёни ақида (0) Санаи нашр: 16.07.13 №: 95 Мутолиа карданд: 5673
