сафарҳо
Сарвари давлат ба Рашт ташриф овард
25 сентябр Президенти Ҷумҳурии Тоҷикистон Эмомалӣ Раҳмон бо мақсади шиносоӣ бо вазъи зиндагии мардум ва ба истифода супурдани як қатор иншоот бо сафари корӣ ба ноҳияи Рашт ташриф овард.
Президенти мамлакат Эмомалӣ Раҳмон нахуст дар Ҷамоати шаҳраки Навободи ноҳияи Рашт бинои нави хобгоҳи мактаб-интернати ҷумҳуриявии кӯдакони ятимро бо буридани лентаи рамзӣ расман ба истифода супурд.
Бинои хобгоҳ барои 200 нафар пешбинӣ шуда, он бо харҷи зиёда аз як миллион сомонӣ аз ҷониби ҶСК “Тоҷиксодиротбонк” бунёд шудааст. Сарвари давлат зимни шиносоӣ ба шароити хобгоҳи мактаб - интернат баҳои баланд дода, барои боз ҳам фароҳам сохтани шароити арзанда ба масъулон дастуру ҳидоят дод.
Дар мактаб-интернати мазкур зиёда аз 250 нафар ба таълиму тарбия фаро гирифта шуда, аз ин шумора 145 нафар падар ё модар надоранд ва 6 нафар ятими кул мебошад.
Президенти мамлакат ба сарпарасти ин мактаб – интернат дастуру ҳидоят дод, ки то моҳи ноябри соли равон ҳамаи тарбиятгирандагони муассисаи таълимиро бо либосҳои гарми зимистона таъмин намоянд. Ҳамчунин дастур дода шуд, ки ба 6 нафар ятими кул дар бонк суратҳисоб кушоянд.
Сарвари давлат мураббиёну омӯзгоронро ҳидоят намуд, ки бо тарбиятгирандагон мисли фарзанди хеш муносибат карда, ба таълиму тарбияи онҳо диққати махсус зоҳир намоянд.
Президенти мамлакат ба масъулон дастур дод, ки роҳи маҳаллии шаҳраки Навободро мумфарш намоянд.
Дар Ҷамоати шаҳраки Навобод ҳамчунин бо иштироки Сарвари давлат Эмомалӣ Раҳмон бинои нави шуъбаи корҳои дохилии Раёсати Вазорати корҳои дохилӣ дар минтақаи Рашт мавриди истифода қарор гирифт.
Шуъбаи корҳои дохилӣ ду- ошёна буда, дорои ҳуҷраҳои муҷаҳҳаз бо лавозимоти зарурӣ, толори хурди варзишӣ, ошхона ва хонаҳои махсус мебошад. Минбаъд кормандони ҳифзи ҳуқуқ дар шароити арзанда фаъолияти босамар хоҳанд намуд.
Сипас Президенти мамлакат дар қисми низомии «Н»-и Гвардияи миллии Ҷумҳурии Тоҷикистон бо шароити хизматии афсарону сарбозон шинос гардид. Сарвари давлат зимни суҳбати озоду самимӣ афсарону сарбозонро ба хизмати содиқонаи халқу Ватан ҳидоят намуд.
Қисми ҳарбии мазкур яке аз воҳидҳои таъиноти махсус буда, бо аслиҳаву техникаи ҳарбӣ, лавозимоту муҳимоти ҷангӣ ва дигар воситаҳои махсуси муосир таъмин шудааст. Намунаи бештари ин воситаҳои муосири техникӣ, ки барои воҳидҳои махсус пешбинӣ шудаанд, дар саҳни қисми ҳарбӣ ба намоиш гузошта шуд.
Дар муддати як сол бо ёриву дастгирии Сарвари давлат бинои асосии қисми ҳарбӣ, синфхонаҳои таълимӣ, хонаҳои маишиву фароғатӣ, хобгоҳу ошхонаи сарбозон ва дигар мавзеъҳои барои хизмат зарур сохта мавриди истифода қарор гирифтанд.
Баёни ақида (0) Санаи нашр: 26.09.13 №: 126 Мутолиа карданд: 1972