мулоқотҳо
Шиносоии Президент бо рафти сохтмони маркази нави барқу гармидиҳии пойтахт
2 октябр, бегоҳии рӯз, Президенти кишвар Эмомалӣ Раҳмон ба мавзеи сохтмони маркази нави барқу гармидиҳии шаҳри Душанбе, ки бо ангишт кор хоҳад кард, ташриф оварда, бо рафти корҳо бевосита шинос шуд.
Кор барои сохтмону таҷҳизи ин корхонаи азими саноатӣ шабу рӯз ва бо сифати баланд ба роҳ монда шудааст. Ба иттилои масъулин, навбати якуми он бо иқтидори 50 мегаватт неруи барқ то охири ҳамин моҳ ба кор дароварда мешавад.
Навбати дуюмаш низ то моҳҳои феврал - марти соли 2014 бояд ба кор омода гардида, иқтидори барқтавлидкунии он ба 100 мегаватт мерасад. Оянда иқтидори ин марказ бо 4 агрегат ба 200 мегаватт хоҳад расид.
Навбати якуми маркази барқу гармидиҳии мазкур зимистони пешомад пурра кор карда, ғайр аз истеҳсоли неруи барқ метавонад то 1,3 миллион метри мураббаъро бо гармӣ таъмин намояд.
Ҳоло дар сохтмони ин марказ 1550 нафар бо кор таъмин гардидаанд. Намояндаи роҳбарияти ширкати чинии "ТВЕА" изҳор дошт, ки онҳо "ба ҷалби ҳарчи бештари коргарон аз Тоҷикистон ҳавасманд мебошанд, вале хоҳишмандон аз сокинони маҳаллӣ зиёд нестанд". Ӯ бо ёдоварӣ аз ҳаҷми маоши бинокори оддӣ, ки 2500 сомониро ташкил медодааст, мутахассисону коргарони соҳаи сохтмони Тоҷикистонро ба кор даъват намуд.
Сарвари давлат Эмомалӣ Раҳмон аз рафти сохтмон изҳори қаноат карда, таъкид дошт, ки марказ бояд дар муҳлатҳои муайяншуда бо сифати баланд ба кор дароварда шавад.
Баёни ақида (0) Санаи нашр: 5.10.13 №: 131 Мутолиа карданд: 2350