номаҳо
Ҳар қитъаи замин таҳти назорат аст
Кумитаи давлатии заминсозӣ ва геодезӣ мақолаи дар рӯзномаи "Ҷумҳурият" № 82-83, аз 15 июни соли 2013 чопшударо бо номи "Замин, об, мушкилоти чандсола ҳал мехоҳад" баррасӣ намуд.
Тибқи маълумоти пешниҳодшудаи кумитаҳои заминсозии шаҳру ноҳияҳои вилояти Хатлон соли 2012 майдони 10608.11 гектар заминҳои корам, аз он ҷумла 7752,78 гектар заминҳои корами обӣ, аз истифода берун монда буданд.
Оид ба истифодаи ғайриқаноатбахши замин ба мақсади хоҷагидорӣ аз тарафи кумитаҳои заминсозӣ нисбат ба истифодабарандагони замин чораҳои маъмурӣ андешида, онҳо ба маблағи 50110 сомонӣ ҷаримабандӣ шуданд. Аз ҷумла барои холӣ мондани заминҳо кумитаҳои заминсозии ноҳияҳои Бохтар масъулони заминистифодабариро ба маблағи 8000 сомонӣ, Н. Хусрав 8000 сомонӣ, Хуросон 1600 сомонӣ, Қубодиён 4000 сомонӣ, А. Ҷомӣ 8400 сомонӣ ва Фархор 8360 сомонӣ ҷаримабандӣ намудаанд.
Мувофиқи мувозинаи заминҳо ба ҳолати 01.01.2012 дар марзи маъмурии вилояти Хатлон ҳамагӣ 24408 гектар заминҳои партов, аз он 22693 гектар заминҳои партови обӣ мавҷуд буда, нисбат ба ҳисоботи солонаи замин ба ҳолати 01.01.2013 сол майдони 416 гектар замини партов ва 505 гектар замини партови обӣ кам гаштааст.
Дар давоми соли 2012 дар ноҳияҳои Н. Хусрав майдони 1 га, Бохтар - 1 га, Қубодиён -1 га, Қумсангир - 56 га, Шаҳритус -1 га ва Ҳамадонӣ - 1 га ба гардиши кишоварзӣ ворид намуда, майдони 335 гектар замини партов дар ноҳияи Ҷилликул ба заминҳои маҳалли аҳолинишин гузаронида шудааст.
Кумитаи заминсозии вилояти Хатлон ва кумитаҳои заминсозии шаҳру ноҳияҳои вилоят дар доираи ваколатҳои худ ва дар самти ба гардиши кишоварзӣ ворид намудани заминҳои партов чораҷӯӣ менамоянд.
М. ЗОКИРОВ,
раиси Кумитаи
давлатии заминсозӣ
ва геодезии
Ҷумҳурии
Тоҷикистон
Баёни ақида (0) Санаи нашр: 12.10.13 №: 134-135 Мутолиа карданд: 1461
