президент
Машварати кории Сарвари давлат
16 декабр Президенти кишвар Эмомалӣ Раҳмон бо иштироки Сарвазири мамлакат Қоҳир Расулзода, муовини якум Давлаталӣ Саидов ва муовини Сарвазир Азим Иброҳим, роҳбари Дастгоҳи иҷроияи Президенти Ҷумҳурии Тоҷикистон Бахтиёр Худоёров, роҳбарони як қатор вазорату идораҳо ва дигар шахсони масъул машварати корӣ доир намуд.
Дар машварат масъалаҳои вобаста ба фаъолияти истеҳсолии Ширкати алюминийи тоҷик (ТАЛКО) ва таъмини мардум бо неруи барқу гармӣ дар фасли зимистон баррасӣ шуданд.
Нахуст ҳисоботи роҳбарияти ширкати ТАЛКО шунида шуд. Чуноне ки зикр гардид, ҳоло бар асари буҳрони иқтисодию молиявӣ ва коҳиш ёфтани нархи алюминийи аввалия дар бозори ҷаҳонӣ бисёр корхонаҳои ин соҳа дар кишварҳои зиёд аз кор бозмондаанд.
Сарвари давлат Эмомалӣ Раҳмон бо назардошти аҳамияти ширкати ТАЛКО дар иқтисоди миллии кишвар ва нақши бузурги иҷтимоии он ба Ҳукумати Ҷумҳурии Тоҷикистон ва вазорату идораҳои марбута дастур дод, ки барои дарёфти роҳҳои дастгирии давлатии ин ширкат чораҳои муассир андешанд.
Дастуру супоришҳои мушаххас ҳамчунин доир ба таъмини муназзами аҳолӣ бо неруи барқ, гармӣ ва дар ҳолати хуб нигоҳ доштани роҳҳои нақлиётии ҷумҳурӣ дар фасли зимистон дода шуданд.
Баёни ақида (0) Санаи нашр: 19.12.13 №: 164 Мутолиа карданд: 26233
