илм
ОЛИМОН БА ДАСТОВАРДҲО НОИЛ ГАРДИДАНД
Дар ҷаласаи солонаи Академияи илмҳои ҷумҳурӣ зикр гардид, ки олимон дар соли сипаригардида ба дастовардҳои зиёд ноил шуданд.
Фарҳод Раҳимов, президенти Академияи илмҳои Тоҷикистон, гуфт, ки «олимон бо истифода аз моделҳои математикӣ системаҳои идоракунии ҷараёни обро дар обанборҳои азим, аз ҷумла обанбори Норак, Қайроққум, Андиҷон коркард намуда, бо истифода аз ин модел танзими онро ба манфиати ояндаи энергетикаи кишвар пешниҳод намуданд. Олимони соҳаи таърих ҷилди аввали маълумотномаи китобшиносӣ оид ба таърихи илм ва техникаро ҷамъбаст намуданд, ки он инкишофи илмҳои табиӣ, дақиқ ва ҷамъиятиро аз қадим то соли 1917 дар бар мегирад».
Дар ҷаласа ҳамчунин зикр шуд, ки харитаҳои бостоншиносии водиҳои Ҳисор, Зарафшон ва ноҳияҳои Шаҳринав, Турсунзода омода шуд. Ҳангоми ҳафриёти ноҳияи Фархори вилояти Хатлон ва омӯзиши бозёфтҳо собит гардид, ки ёдгориҳои нодири ин мавзеъ ба осори таърихии Саразм шабоҳат доранд.
Барои иштирок дар конференсия, анҷом додани тадқиқотҳои илмӣ, таҳсил ва коромӯзӣ 59 корманди академия ба 45 давлати хориҷӣ сафари хидматӣ намуданд. Барои саҳмгузории назаррас дар рушди илм кормандон ба ҷоизаву унвонҳои фахрии байналмилалӣ сазовор гардиданд. Аз ҷумла академик Раҳим Масов Ҷоизаи байналмилалии «Аъзои Иттиҳод»- ро соҳиб шуд. Академик Талбак Назаров, профессори фахрии Академияи илмии стратегии иқтисодии Ҷумҳурии Мардумии Чин интихоб шуд. Доктори илмҳои тиб, профессор Нуралӣ Юсуфов нишони Академияи Вазорати тибби Федератсияи Русия ва Ҷоизаи «Тян Тин»- и Ҷумҳурии Мардумии Чинро созовор гардид.
Дар маҷлис Марҳабо Ҷаб-борова, муовини Сарвазири ҷум-ҳурӣ, иштирок дошт ва барои пешрафти соҳа дастуру маслиҳатҳои судбахш дод.
Фарзонаи Файзалӣ, «Ҷумҳурият»
Баёни ақида (0) Санаи нашр: 17.01.2014 №: 13 Мутолиа карданд: 1610
