илм
ИСҚОТИ ҲАМЛ ЗИЁД ШУД
Соли гузашта нахустин маротиба дар ҷумҳурӣ тавассути дастгоҳи даруннигарии ҷарроҳии асаб амалиёти табобатӣ дар сутунмуҳра ва зиёда аз 70 амалиёти пайвандсозии гурда гузаронида шуд, ки аз ин 3 нафарашон наврасони 13-15 - солаанд.
Дар ин бора Нусратулло Салимов, вазири тандурустӣ ва ҳифзи иҷтимоии аҳолӣ, зимни нишасти матбуотӣ иттилоъ дод.
- Бо дастгири Ҳукумати кишвар аз ҳисоби маблағҳои давлатии вазорат дастгоҳи даруннигарии ҷарроҳии асаб харидорӣ гардид. Дар маҷмӯъ 1095 амалиёти ҷарроҳӣ дар дилу рагҳо, 1 805 ангиография, 239 деворгузорӣ ва 138 васли шоҳраг гузаронида шуд. Ду шаҳрванди бемори мо, ки қаблан дар хориҷи кишвар ҷарроҳии гурда карда буданд, маротибаи дувум ҷарроҳӣ гардиданд. Исқоти ҳамл нисбат ба cоли гузашта 22 % зиёд шуд. Аз 11 618 ҳолати исқоти ҳамл 70 % сабабҳои бачапартоии ғайриихтиёрӣ мебошад.
Қаблан тавассути дастгоҳҳо исқоти ҳамл сурат мегирифт, ки ба ҳаёти инсон хатар дошт. Солҳои охир исқоти ҳамл тавассути маводи доруворӣ сурат мегирад, ки ин хатарро аз байн бурд. Ҳангоми исқоти ҳамл ҳодисаи фавт ба қайд гирифта нашудааст, - афзуд вазири тандурустӣ ва ҳифзи иҷтимоии аҳолӣ.
Иттилоъ дода шуд, ки дар самти «Барномаи миллии пешгирӣ, ташхис ва табобати беморони гирифтори нуқсонҳои модарзодӣ ва тарбодии дил дар Ҷумҳурии Тоҷикистон барои солҳои 2011-2015» ба 178 кӯдаки гирифтори ингуна нуқсонҳо амалиётҳои ҷарроҳӣ гузаронида шуд. Аз ҳисоби маблағҳои буҷавии шаҳри Душанбе зиёда аз 380 000 сомонӣ барои табобати кӯдакони гирифтори ин беморӣ ҷудо гардидааст.
Ҳарамгули ҚОДИР
Баёни ақида (0) Санаи нашр: 18.01.2014 №: 14 Мутолиа карданд: 1681
