ҳукумат
ҶАЛАСАИ КУМИТАИ ТАДОРУКОТ ДАР ҲУЗУРИ САРВАЗИР
30 январ дар ҳузури Сарвазири Ҷумҳурии Тоҷикистон Қоҳир Расулзода ҷаласаи навбатии Кумитаи тадорукоти таҷлили ҷашни 3000- солагии Ҳисор баргузор шуд.
Дар ҷаласа оид ба рафти омодагиҳо, аз ҷумла раванди пешбурди корҳои сохтмонӣ, таъмиру навсозӣ, ободонӣ ва сабзу хуррамнамоӣ гузориши аъзои Кумитаи тадорукот, роҳбарони вазорату идораҳои дахлдор ва роҳбарияти мақомоти иҷроияи маҳаллии ҳокимияти давлатии ноҳияи Ҳисор шунида шуд.
Тавре таъкид шуд, имрӯзҳо дар қаламрави ноҳия корҳои ободонию бунёдкорӣ вусъати тоза гирифта, дар аксар иншооти ҷашнӣ корҳои сохтмонӣ бо маром ҷараён дорад ва дар қисми дигари иншооти пешбинишуда корҳои лоиҳакашию банақшагирӣ шурӯъ гардидаанд.
Сарвазири мамлакат бо назардошти аҳамияти таърихии ҷашни 3000-солагии Ҳисор таъкид кард, ки таҷлили ин санаи таърихӣ аз як ҷониб воситаи муаррифии бештари таърихи куҳан доштани ин сарзамин бошад, аз ҷониби дигар омили хуби таъмини пешрафт ва рушди иқтисодию иҷтимоии ноҳия ба ҳисоб меравад.
Бо ин мақсад дар фурсати кӯтоҳ барои дар феҳристи ёдгориҳои таърихии ЮНЕСКО ворид кардани мавзеъҳои таърихии Ҳисор ва дар доираи чорабиниҳои ин созмони муътабари ҷаҳонӣ таҷлил кардани ҷашни 3000-солагии он зарур шуморида шуд.
Қоҳир Расулзода аъзои Кумитаи тадорукотро вазифадор кард, ки ҷиҳати саривақт мусоидат намудан ба корҳои сохтмонӣ, таҳияи лоиҳаи таҷдид ва навсозии роҳи марказӣ ва роҳҳои маҳаллии ноҳия, ҷудо намудани қитъаҳои замин барои бунёди иншооти пешбинишуда, беҳбуди шабакаҳои обу корез, фароҳам овардани шароити зарурии таъминоти оби нӯшиданӣ ва неруи барқ тадбирҳои амалӣ роҳандозӣ намоянд.
Субҳиддин МУҲИДДИНОВ,
машваратчии калони Хадамоти матбуоти
Президенти Ҷумҳурии Тоҷикистон
Баёни ақида (0) Санаи нашр: 1.02.2014 №: 24 Мутолиа карданд: 1623
