энергетика
ИСТИХРОҶИ ГАЗУ НАФТ КАМ ШУДААСТ
- Истеҳсоли неруи барқ дар соли 2013 аз ҳисоби корхонаю муассисаҳои системаи вазорат 17 миллиарду 92 миллион кВт. соат ва энергияи гармӣ 127,8 ҳазор гекакаллорийро ташкил дод.
Ҳаҷми воқеии талафоти технологии неруи барқ дар ин давра 14, 9 фоиз ё 2 миллиарду 525 миллион кВт. соатро ташкил медиҳад, ки дар муқоиса бо соли 2012 92,3 миллион кВт. соат (0,5 фоиз) зиёд мебошад. Маблағи ҳисобшудаи неруи барқи бафурӯшрафта 1 миллиарду 275 миллион сомонӣ ё ба 83,9 фоизи нақша баробар шудааст. Қарзи умумии корхонаҳо ва ташкилотҳои соҳаи об аз истифодаи неруи барқ бо назардошти қарзи солҳои гузашта ба 229,4 миллион сомонӣ расидааст, - гуфт Усмоналӣ Усмонов, вазири энергетика ва захираҳои оби Ҷумҳурии Тоҷикистон.
- Инчунин, дар ин давра корхонаю муассисаҳои соҳаи нафту газ 27319 тонна нафт ва 3 миллиону 928 ҳазор метри мукааб гази табиӣ истихроҷ намуда, нақшаро мутаносибан 91,2 ва 36,4 фоиз таъмин карданд. Сабаби иҷро нагардидани нақшаи истихроҷи нафту газ дар конҳои амалкунанда, ин кам шудани захираҳои нафту газ ва дар марҳилаи охирини истихроҷ қарор доштани конҳои амалкунанда мебошад,- зикр кард вазир.
Нигинаи РАҲМОН
Баёни ақида (0) Санаи нашр: 4.02.2014 №: 25 Мутолиа карданд: 11753
