маориф
МАКТАБИЁНИ СУҒД БА НИЗОМИ ТЕСТӢ ОМОДААНД
Барои омодагӣ ва шарҳи возеҳи афзалиятҳои низоми нави дохилшавӣ ба мактабҳои олии кишвар дар Маркази миллии тестӣ аз ҳисоби мудирони кабинетҳои методии шуъбаҳои маорифи шаҳру навоҳӣ аз 6 то 12 январ дар шаҳри Душанбе, дар доираи 36 соат курсҳои махсуси омӯзишӣ ташкил шуд. Иштирокдорони ин курсҳои омӯзишӣ баъди бозгашт ба вилояти Суғд маълумоти дақиқро оид ба низоми нави имтиҳонсупорӣ ба хатмкунандагони макотиби таҳсилоти миёнаи умумӣ, омӯзгорону волидайн фаҳмонданд.
- Аксари довталабони шаҳри Қайроққум, ки мехоҳанд ба донишгоҳҳои гуногуни кишвар дохил шаванд, ба таври амиқ аз низоми тестӣ огоҳӣ ёфтанд, - мегӯяд Муяссар Ҳайдаров, мудири маорифи шаҳр.
Ҳоло дар доираи омодагӣ ба имтиҳонҳои дохилшавӣ марҳилаи дувум оғоз ёфтааст, яъне сабти довталабон дар марказҳои миллии тестӣ. Дар вилояти Суғд ба хотири рӯ ба рӯ нагаштан ба мушкилӣ ва монеаҳои сунъӣ се маркази сабт дар шаҳрҳои Хуҷанд, Панҷакент ва ноҳияи Бобоҷон Ғафуров таъсис ёфт. Мутобиқ ба мавқеи ҷуғрофии ҷойи зист довталабон медонанд, ки кадом марказ ба онҳо наздиктар аст. Довталабони навоҳии Айнӣ ва Кӯҳистони Мастчоҳ ба шаҳри Панҷакент, Мастчоҳу Ашт ва шаҳри Истиқлол ба шаҳри Хуҷанд, Исфара, Конибодом ва Қайроққум ба маркази бақайдгирии ноҳияи Бобоҷон Ғафуров муроҷиат мекунанд.
- Ҳамаи марказу нуқтаҳои бақайдгирӣ пура ва дар сатҳи баланд ба маъракаи қабули довталабон омодаанд,- иброз медорад Бозорбой Розиқов, роҳбар-ҳамоҳангсози Муассисаи давлатии Маркази миллии тестии назди Президенти Ҷумҳурии Тоҷикистон дар вилояти Суғд. Одамони касбу кори гуногуни вилоят фикру мулоҳизоти хешро оид ба низоми нави дохилшавии довталабон ба макотиби олии кишвар баён мекунанд ва умед доранд, ки чунин роҳи пешгирифта ба дарёфти воқеии ҷавонони донишманд мусоидат мекунад.
- Низоми тестӣ бояд монеаи ҷиддӣ ба зуҳуроти номатлуб, аз ҷумла фасод гардад,- мегӯяд Сулаймон Аминов, директори мактаби таҳсилоти миёнаи умумии ноҳияи Ашт.
Бино ба иттилои Муҳаббат Нозимова, сардори Раёсати маорифи вилояти Суғд, соли равон мактабҳои вилоятро 32 ҳазору 750 нафар хатм карда, зиёда аз 20 ҳазори онҳо эҳтимоли идома додани таҳсилро дар донишгоҳу донишкадаҳои кишвар доранд.
Ҷовиди АШТӢ, «Ҷумҳурият»
Баёни ақида (0) Санаи нашр: 4.03.2014 №: 43 Мутолиа карданд: 1483
