маориф
ДАР БАДАХШОН ИЛМ ГУЛ МЕКУНАД
Модари тоҷик бисёр фарзандонро, ба монанди Абуалӣ ибни Сино, Умари Хайём, Носири Хусрав, Берунӣ, Аҳмади Дониш ва даҳҳо бузургони дигарро ба дунё овардааст, ки онҳо дар рушди илм, фарҳанг ва тамаддуни башар нақши хоса гузоштаанд.
Имрӯз низ неруи зеҳнии модарон имкон медиҳад, ки олимони мо ин анъанаи некро идома дода, дар самтҳои гуногуни илм парчамбардор бошанд.
Барои рушди илму маориф ва фарҳанг бояд шароити мусоид, заминаи моддию техникӣ вуҷуд дошта бошанд. Аз ин рӯ, Ҳукумати мамлакат як қатор санадҳоеро дар робита ба рушди илм омода ва тасдиқ намуд, ки барои пешрафти кори муассисаҳои илмии кишварамон ва рушди ҳамаҷонибаи илм мусоидат менамоянд. Имрӯз пешрафти илм дар баробари маорифу фарҳанг аз самтҳои афзалиятноку стратегии давлат ба шумор меравад. Ҳаҷми маблағгузории давлат ба соҳаи илм фақат дар панҷ соли охир се баробар афзуд. Барои ба фаъолияти пурсамари илмӣ ҷалб намудани олимони ҷавон маоши онҳо сол ба сол баланд бардошта мешавад. Фақат дар соли 2011 бо фармони Сарвари давлат маоши онҳо ду баробар зиёд шуд.
Имрӯз дар ВМКБ се муассисаи илмӣ – Донишгоҳи давлатии Хоруғ, Пажӯҳишгоҳи улуми инсонии Академияи илмҳои Ҷумҳурии Тоҷикистон ва Пажӯҳишгоҳи биологии Помир бо неруи бузурги илмӣ фаъолият доранд ва кормандони ин муассисаҳои илмию таълимӣ оид ба бахшҳои гуногуни иқтисод, иҷтимоъ, таъриху фарҳанг таҳқиқотҳои пурарзишро анҷом медиҳанд.
Ба шарофати истиқлолият ва сиёсати давлат таҳти сарварии Президенти Ҷумҳурии Тоҷикистон Эмомалӣ Раҳмон зани тоҷик имрӯз дар ҷомеа мақоми сазовори худро пайдо намудааст. Бонувон дар тамоми соҳаҳо баробари мардон ба фаъолияти самарабахши худ дар таҳкими давлати соҳибистиқлол, устуворсозии пояҳои давлати миллӣ, рушди иқтисодии кишвар ва солимгардонии ҷомеа бо кору пайкори созанда ширкат меварзанд.
Дар муассисаҳои илмии вилоят 17 бону номзади илм аст. Дар даҳ соли охир 63 духтар аспирантураро хатм намуданд, ки ин солҳои пеш тасаввурнопазир буд.
Айни ҳол дар шуъбаи аспирантура 40 нафар ва дар докторантура 3 нафар духтарони унвонҷӯй таҳсил доранд. Омӯзгор Қурбонбегим Собирова рисолаи докториашро ба баррасӣ пешниҳод намуда, дар остонаи ҳимоя қарор дорад. Аз байни олимаҳои ҷавони вилоят як нафар барандаи Ҷоизаи давлатии ба номи Исмоили Сомонӣ мебошад.
Раҳмони Гулзор, «Ҷумҳурият»
Баёни ақида (0) Санаи нашр: 18.03.2014 №: 52 Мутолиа карданд: 1490
