мулоқотҳо
ХУШБИНИИ ЙОЗЕФ БЛАТТЕР АЗ ДУРНАМОИ ФУТБОЛ ДАР ТОҶИКИСТОН
25 март Эмомалӣ Раҳмон, Президенти Ҷумҳурии Тоҷикистон, Йозеф Блаттер, президенти Федератсияи ҷаҳонии футбол (ФИФА) - ро, ки бо сафари дурӯза дар Тоҷикистон қарор дошт, ба ҳузур пазируфт.
Хадамоти матбуоти Президенти Ҷумҳурии Тоҷикистон иттилоъ медиҳад, ки дар мулоқот масоили вобаста ба рушди футбол ва таъмини оммавияти варзиш дар мамлакат баррасӣ шудааст. Бино ба гузориши манбаъ, Йозеф Блаттер “Соли футболи оммавӣ” дар Тоҷикистон эълон гардидани соли 2014 - ро иқдоми шоистаи дастгирӣ номида, изҳор намудааст, ки “иштирок дар маросими оғози татбиқи ин ташаббус аз ҳадафҳои сафар”-и ӯ ба Тоҷикистон аст.
Дар мулоқот ҷонибҳо изҳори умед карданд, ки иқдомҳои пайвастаи Ҳукумати ҷумҳурӣ доир ба бунёди инфрасохтори варзишӣ, аз ҷумла доир ба сохтмони варзишгоҳҳо ва дигар иншооти ин соҳа, тарғибу ташвиқи насли наврас ба тарзи ҳаёти солим боиси рушду тараққиёти босуръати футбол ва дигар намудҳои варзиш дар Тоҷикистон хоҳад шуд.
Йозеф Блаттер, Президенти ФИФА, мулоқоташ бо Сарвари давлатро дӯстонаву созанда номид. Президенти ФИФА аз таваҷҷуҳи доимии Эмомалӣ Раҳмон ба рушди варзиш, алалхусус футбол ва бунёди варзишгоҳҳои ҷавобгӯ ба талаботи меъёрӣ истиқбол намуда, ба тавсеаи ин намуди варзиш дар Тоҷикистон хушбинӣ кард. Номбурда, ҳамчунин талошҳои роҳбарияти Федератсияи футболи ҷумҳуриро қобили дастгирӣ дониста, футбол дар Тоҷикистонро рӯ ба инкишоф арзёбӣ кард.
– Мо умедворем, ки рӯзе тими мунтахаби Тоҷикистон ба сифати яке аз дастаҳои пурқувват дар мусобиқоти бонуфузи байналмилалӣ баромад хоҳад кард,- изҳор дошт Йозеф Блаттер.
Президенти ФИФА дар доираи сафараш ба Тоҷикистон, сабқати дастаҳои «Истиқлол»-и Душанбе ва «Равшан»-и Кӯлобро барои ба даст овардани Шоҳҷоми Тоҷикистон тамошо карда, ба дастаи ғолиб Ҷоми Олии кишварро супурд. Ин бозӣ бо ҳисоби 5:0 ба фоидаи дастаи «Истиқлол» - и Душанбе анҷом шуд.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 28.03.2014 №: 57 Мутолиа карданд: 1337
