номаҳо
ИНТИХОБИ КАСБ БОЯД ЧӢ ГУНА БОШАД?
Барои наврасон, хусусан, онҳое, ки дар синфи 11-и мактабҳои таҳсилоти миёнаи умумӣ таҳсил мекунанд, интихоби касб аз мушкили асосӣ ба шумор меравад. Азбаски бештари онҳо дар бораи ихтисосҳои гуногуни макотиби олии кишвар маълумоти зарурӣ надоранд, ҳангоми интихоби касб ба мушкилии зиёд рӯ ба рӯ мешаванд. Аслан интихоби касб ба малакаву маҳорат ва табъу завқи инсон бастагӣ дорад ва ҳар нафар бояд мувофиқи донишу истеъдодаш касберо интихоб кунад. Аммо дар ин росто мушкили дигар дар он аст, ки имрӯз интихоби касб низ вобаста ба имкони молӣ сурат гирифта, торафт хусусияти тиҷоратӣ пайдо мекунад. Дар ин ҳол довталабон касбу ихтисоси худро на аз рӯи завқу табъи худ, балки бо назардошти тавоноии ҷайби волидайн интихоб менамоянд. Яъне меандешанд, ки оё волидайнашон имкони пардохти солонаи таҳсилро доранд.
Нафаре, ки касбашро аз рӯи дониш ва маҳорату малака интихоб менамояд, албатта, дар зиндагӣ муваффақ мегардад.
Аз ин рӯ, зарур аст, ки довталабон ҳангоми интихоби пешае дар бораи он маълумоти зарурӣ пайдо намоянд. Муассисаҳои таҳсилоти олии касбӣ низ бояд ба толибилмони мактабҳои таҳсилоти миёнаи умумӣ дар бораи ихтисосҳои гуногун, базаҳои илмии мавҷуда бо шаклҳои гуногун маълумот диҳанд. Шабакаҳои интернетии макотиби олии касбии кишвар дар бораи донишгоҳ, факултаву ихтисосҳо маълумоти муфассал интишор намоянд. Дар кишварҳои хориҷӣ, мактабҳои таҳсилоти олии касбӣ натанҳо дар дохили кишвари худ, балки берун аз он бо довталабон дар иртиботанд ва ҳамеша ба онҳо дар бораи ихтисосҳои гуногун маълумоти зарурӣ медиҳанд. Бахусус дар кишварҳои Русия, Туркия, Беларус, Ҳиндустон, Қирғизистону Қазоқистон ба ин масъала таваҷҷуҳи зиёд доранд. Мутаассифона, дар кишвари мо ба ин масъала он қадар диққати ҷиддӣ дода намешавад. Ҳатто сайтҳои интернетии баъзе аз донишгоҳҳои кишвар фаъол нестанд.
Бахтовари Муҳаммадалӣ, донишҷӯи ДМТ
Баёни ақида (0) Санаи нашр: 6.05.2014 №: 83-84 Мутолиа карданд: 1929
