маориф
МАОРИФ - ОМИЛИ АМНИЯТ
Пешниҳоди Паёми Президенти Ҷумҳурии Тоҷикистон аз муҳимтарин воқеаҳои сиёсӣ ва иқтисодии кишвар маҳсуб гардида, муайянкунандаи самти рушди иқтисодӣ ва иҷтимою сиёсии кишвар, назари сиёсии Сарвари давлат ба дастовардҳои як соли гузаштаву воқеаҳои муҳими ҷаҳонӣ ва вазифагузорӣ барои фаъолияти миёнамуҳлати Ҳукумати ҷумҳурӣ мебошад.
Аз ҷумла, вобаста ба дастуру ҳидоятҳои Президенти Ҷумҳурии Тоҷикистон Ҷаноби Олӣ, муҳтарам Эмомалӣ Раҳмон дар Паёми соли гузашта, ки қайд намуда буданд, «мо раванди таълиму тарбияро самти афзалиятноки сиёсати иҷтимоии давлат қарор дода, ҳамаи тадбирҳои заруриро дар ин самт амалӣ гардонида истодаем» дар соҳаи маориф ҷиҳати фаро гирифтани шумораи ҳарчи бештари кӯдакон ба муассисаҳои томактабӣ, сохтмону афзоиши маблағгузории муассисаҳои таҳсилоти умумӣ, ба таври ҷиддӣ беҳтар кардани заминаҳои моддиву техникӣ ва маблағгузории муассисаҳои таҳсилоти ибтидоӣ ва миёнаи касбӣ, ба роҳ мондани тарбияи кадрҳо дар муассисаҳои таҳсилоти олии касбии мамлакат ва хориҷ бо назардошти эҳтиёҷоти воқеии соҳаҳои гуногуни иқтисоди миллӣ ба мутахассисони дорои донишу малакаи муосири сатҳи байналмилалӣ тадбирҳо андешида шуд.
Дар Паёми имсолаи Сарвари давлат илму маориф яке аз “самтҳои калидӣ”, иқтисоди миллӣ ва мактабу маориф “омили муҳимтарини амнияти миллӣ” номида шудааст.
Президенти кишвар ба мақому манзалати омӯзгор дар ҷомеа баҳои баланд дода, ба ҳамаи ниҳоди ҳукуматӣ супориш доданд, иҷрои бечунучарои муқаррароти Қонуни Ҷумҳурии Тоҷикистон «Дар бораи маориф» дар мавриди мақоми омӯзгор ва имтиёзҳои барои омӯзгор муайяншударо таъмин созанд.
Бо мақсади омода намудани кадрҳои ҷавобгӯйи талаботи иқтисоди миллӣ таъкид шуд, ки барои рушди муассисаҳои таҳсилоти олии касбӣ ва ҷорӣ намудани меъёрҳои байналмилалии таҳсилот тамоми имкониятҳои Ҳукумати Тоҷикистон истифода бурда мешаванд.
Мо - маорифчиён аз эътиқоду пуштибонии Сарвари давлат аз соҳаи маориф ва омӯзгор ифтихор намуда, барои амалӣ намудани дастуру ҳидоятҳои Президенти кишвар тамоми чораҳоро меандешем. Ба андешаи мо, иҷрои саривақтии ин дастуру ҳидоятҳо, ки дар Паём дарҷ гардидаанд, барои баланд бардоштани сатҳи некуаҳволии мардум, махсусан тавассути рушди илму маориф, рушди саноату энергетика, таъмини амнияти озуқаворӣ, баровардани мамлакат аз бунбасти коммуникатсионӣ ва инкишофи босуръати соҳаҳои бунёдӣ имконият медиҳад.
Фатҳиддин ИСМОНОВ,
муовини вазири маориф ва илми ҷумҳурӣ
Баёни ақида (0) Санаи нашр: 8.05.2014 №: 86 Мутолиа карданд: 1435
