мулоқотҳо
ТОҶИКИСТОНУ ҲИНДУСТОН БА РУШДИ ҲАМКОРИҲО ҲАВАСМАНДАНД
Рӯзи 7 май Эмомалӣ Раҳмон, Президенти Ҷумҳурии Тоҷикистон, Суҷатҳа Сингҳ, котиби корҳои хориҷии Вазорати корҳои хориҷии Ҷумҳурии Ҳиндустонро ба ҳузур пазируфт. Бино ба гузориши Хадамоти матбуоти Президенти ҷумҳурӣ, дар мулоқот масоили вобаста ба муносиботи дӯстӣ ва ҳамкории судбахши Тоҷикистону Ҳиндустон баррасӣ шудааст.
Суҷатҳа Сингҳ баъд аз дидору гуфтугӯ бо Сарвари давлат дар ҷамъи хабарнигорон аз таваҷҷуҳи Эмомалӣ Раҳмон ба рушди ҳамкориҳои дуҷониба истиқбол кард. Вай паёми самимии Президент ва Сарвазири кишварашро ба Эмомалӣ Раҳмон расонда, гуфт, ки Ҳиндустон омода аст, минбаъд низ дар татбиқи амалии лоиҳаҳои инвеститсионии Тоҷикистон, бахусус дар бахшҳои энергетика ва зербинои нақлиётӣ саҳмгузор бошад.
Котиби корҳои хориҷии Вазорати корҳои хориҷии Ҷумҳурии Ҳиндустон мулоқоташ бо Президенти мамлакатро судманду заминасози таҳкими ҳамкориҳои минбаъда унвон кард. Бино ба гуфтаи ӯ, дар суҳбат оид ба тавсеаи равобити таърихӣ байни ду кишвар, татбиқи босамари санадҳои ҳамкорие, ки дар сатҳу зинаҳои гуногун тасвиб шудаанд, табодули назар сурат гирифтааст.
Суҷатҳа Сингҳ ҳамчунин иброз дошт, ки масоили вобаста ба пойдории сулҳу ҳамгироӣ дар минтақа дар меҳвари гуфтугӯи мо бо ҷаноби Президент қарор дошт.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 9.05.2014 №: 87 Мутолиа карданд: 1266
