номаҳо
БАЛҶУВОН. САЛОМАТИИ АҲОЛӢ - ДАР МАДДИ НАЗАР
Раёсати тандурустии мақомоти иҷроияи ҳокимияти давлатии вилояти Хатлон оид ба шаҳру ноҳияҳои минтақаи Кӯлоб, хабари «Балҷувон.Тандурустӣ аз мадди назар дур аст» («Ҷумҳурият»,17 майи соли 2014)-ро баррасӣ намуда, чунин иттилоъ медиҳад:
Ба аҳолии ноҳияи Балҷувон 36 муассисаи тандурустӣ, аз ҷумла, 1 беморхонаи марказӣ,1 маркази саломатии ноҳиявӣ, 2 беморхонаи рақамӣ, 10 маркази саломатии деҳотӣ, 16 бунгоҳи тиббӣ, 1 МНДСЭ ва 5 маркази гуногун хизмат мерасонанд. Аз инҳо 2 бунгоҳи тиббӣ дар вагон, 8 бунгоҳи тиббӣ дар хонаҳо фаъолият мекунанд.
Мувофиқи «Барномаи рушди соҳаи тандурустии вилояти Хатлон барои солҳои 2013-2015» дар ноҳия як қатор корҳои сохтмонӣ, таъмирӣ ва бо таҷҳизоти тиббӣ ҷиҳозонидан ба анҷом расиданд. Аз ҳисоби маблағҳои Вазорати тандурустӣ ва ҳифзи иҷтимоии аҳолии ҷумҳурӣ сохтани бинои дуошёнаи шуъбаҳои ҷарроҳӣ ва таваллудхона идома дорад.
Бо маблағи мақомати иҷроияи ҳокимияти давлатии вилояти Хатлон дар соли 2013 дар Ҷамоати деҳоти Сарихосор ва деҳаи Садаҳо бунгоҳи тиббӣ навсозӣ гашта, бо мизу курсӣ, ҷевонҳо ва ғайра ҷиҳозонида шуданд. Инчунин бунгоҳи саломатии деҳаи Боғизоғон ва маркази саломатии Ҷамоати даҳоти Дектур аз таъмири асосӣ баромаданд.
Имрӯзҳо дар маркази саломатии деҳаи Солмолидашт ва бунгоҳи тиббии деҳаи Шаҳиди Бобохон тавассути ҳисоби маблағҳои мақомоти иҷроияи ҳокимияти давлатии вилояти Хатлон корҳои сохтмонӣ пеш мераванд. Ҳамзамон дар маркази ноҳия сохтмони бинои нави маркази саломатии ноҳиявӣ бо дастгирии молии Сафорати Ҷопон идома дорад. Шумораи воҳидҳои кории соҳаи тандурустии ноҳияи Балҷувон 415,5 воҳидро ташкил медиҳад ва 338 воҳиди корӣ банд буда, 26 табиб, 21 корманди миёнаи тиббӣ, 16 корманди хурди тиббӣ ва 14 - то кормандони дигар намерасанд.
Ҳар сол бо ҷалби мутахассисони муассисаҳои тандурустии вилоятии дар шаҳри Кӯлоб буда, ба ноҳияи Балҷувон «Корвони саломатӣ» ташкил мегардад ва шаҳрвандон аз муоинаи тиббӣ мегузаранд. Шахсоне, ки ба амалиёти ҷарроҳӣ ниёз доранд, дар маркази ноҳия ва беморхонаҳои вилоятии шаҳри Кӯлоб бистарӣ мешаванд. Айни замон аз ҷониби мақомоти дахлдор барои бартараф намудани камбудиҳо чораҳои мушаххас андешида мешаванд.
М. МИРАЛИЕВ, муовини сардори
Раёсати тандурустии вилояти Хатлон оид
ба шаҳру ноҳияҳои минтақаи Кӯлоб
Баёни ақида (0) Санаи нашр: 3.06.2014 №: 104 Мутолиа карданд: 1552
