мулоқотҳо
ЛОИҲАИ ҲИСОБОТ БАРРАСӢ МЕШАВАД
Лоиҳаи ҳисобот доир ба баҳогузории иқтисодӣ ва иҷтимоию экологии тарҳи Неругоҳи барқи обии Роғун, ки аз сӯи Бонки ҷаҳонӣ идома дорад, моҳи июн нашр ва моҳи июли соли равон дар вохӯрӣ бо намояндагони кишварҳои соҳили Ому мавриди баррасӣ қарор дода мешавад.
Ин матлабро Сароҷ Кумар Ҷа, директори минтақавии Бонки ҷаҳонӣ оид ба Осиёи Марказӣ, нимаи дувуми рӯзи 30 май баъд аз мулоқот бо Эмомалӣ Раҳмон, Президенти Ҷумҳурии Тоҷикистон, ба хабарнигорон баён намуда, иттилоъ дод, ки ҳисоботи ниҳоӣ дар ин маврид моҳи августи соли ҷорӣ пас аз омӯзиши афкори мардуми минтақа тасдиқ хоҳад шуд.
Хадамоти матбуоти Президенти Ҷумҳурии Тоҷикистон дар иртибот ба мулоқоти Сарвари давлат бо директори минтақавии Бонки ҷаҳонӣ оид ба Осиёи Марказӣ иттилоъ медиҳад, ки зимни дидор масоили ҳамкории Тоҷикистон бо ин муассисаи бонуфузи байналмилалӣ, дастгирии рушди иҷтимоию иқтисодии Тоҷикистон, коҳиш додани таъсири манфии буҳрони иқтисодию молиявии ҷаҳонӣ ба иқтисоди кишвар ҳисоботи корҳои тадқиқотиву баҳодии лоиҳаи «Неругоҳи барқи обии Роғун» баррасӣ шуд. Бино ба гузориши манбаъ, инчунин дар суҳбат Президенти мамлакат изҳори боварӣ намудааст, ки мавқеи Бонки ҷаҳонӣ дар омӯзиши ҳамаҷонибаи лоиҳаи неругоҳ то охир воқеӣ ва мустақил боқӣ хоҳад монд.
Зимнан, Сароҷ Кумар Ҷа дар суҳбат бо хабарнигорон мулоқоташ бо Сарвари давлати Тоҷикистонро судманд арзёбӣ намуда, изҳор дошт, ки дар ин гуфтугӯ, ҳамчунин ҳамкориҳо дар бахшҳои гуногун, назири обу энергетика, кишоварзӣ, дастгирии бахши хусусӣ мавриди баррасӣ қарор гирифта, оид ба татбиқи лоиҳаҳои дорои аҳамияти минтақавӣ табодули назар сурат гирифт.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 3.06.2014 №: 104 Мутолиа карданд: 1339
