номаҳо
Кумитаи ҷашнии Наврӯз таъсис ёбад
Наврӯз аз идҳои миллӣ ва суннатии мо аст.Ҳамасола бо фарорасии он омодагӣ мегирем, то онро беҳтар аз пештар таҷлил намоем. Аммо ҳанӯз бо он шукӯҳ ва муҳаббате, ки бояд, наметавонем ин иди бузургро таҷлил кунем. Чаро? Чунки дар бораи Наврӯз, хоса таърихи он, маълумоти кофӣ надорем. Намедонем, ки ниёгонамон чӣ гуна онро таҷлил менамуданд. Дар барномаҳову намоишҳои ҷашнии радиову телевизионҳо баъзе ғалатҳо роҳ меёбанд ва ин гувоҳ бар надонистани иди миллиямон аст. Инчунин як барномаи (программа) дурусту комил дар кишвар барои таҷлили Наврӯз вуҷуд надорад. Дар ҳар ҷо ҳар тавр онро мегузаронанд. Шеърҳои нав низ бо он муҳаббати пешин ба васфи Наврӯз эҷод намегардад. Чандин сол боз дар интизори чопи китоби «Наврӯзнома»-ем, аммо ҳеҷ не, ки он омодаву чоп гардад.
Мехоҳам, ки чанд моҳ пеш аз Наврӯз кумитаи ҷашние созмон бидиҳанд ва он дар тарғиб, ташкили ҷашн дар тамоми кишвар саҳми чашмрас бигирад. Ҳамчунин ин кумита бояд дар назди мардум рӯзи Наврӯз ба воситаи телевизион ва радио ва матбуоти даврӣ аз фаъолияташ ҳисобот диҳад.
Абдураҳим Махсуддинов,
ноҳияи Ҷалолуддини Румӣ
Баёни ақида (0) Санаи нашр: №: Мутолиа карданд: 2982
