мулоқотҳо
Тарафҳо
изҳори
омодагӣ
намуданд
18 феврал Президенти Ҷумҳурии Тоҷикистон Эмомалӣ Раҳмон инчунин муовини якуми сарвазири Ҷумҳурии Ӯзбекистон Рустам Азимовро, ки дар раъси ҳайати Ӯзбекистонии Комиссияи байниҳукуматии ҳамкориҳои иқтисодию тиҷоратӣ ба шаҳри Душанбе ташриф овардааст, ба ҳузур пазируфт.
Бояд тазаккур дод, ки ҳамзамон бо ин Комиссия дар Душанбе ҳайати байниҳукуматии ду кишвар оид ба баррасии масоили сарҳади давлатӣ низ иҷлоси худро баргузор намудааст, ки ҳамин тариқа дар доираи фаъолияти ин ду комиссия куллияи масоили дуҷониба баррасӣ шуданд.
Дар мулоқоти Сардори давлат ва Раиси ҳайати мамлакати ҳамсоя масоили беҳтарнамоии муносибатҳои байни Тоҷикистону Ӯзбекистон мавриди баррасӣ қарор гирифт.
Ба ҳаллу фасли масоили вобаста ба истифодаи захираҳои обию энергетикии Тоҷикистон, муайяннамоии хатти сарҳади давлатии миёни ду кишвар, рушди ҳамкориҳои минтақавии иқтисодию тиҷоратӣ ва як теъдод масоили мавриди нигаронӣ, аз ҷумла мушкилоти раводиду интиқоли транзитии мавод, таваҷҷӯҳи асосӣ зоҳир карда шуд.
Ҳар ду ҷониб таъкид бар он дошт, ки ҳамаи масоили баҳсталаби миёни Тоҷикистону Ӯзбекистон бояд бо назардошти анъанаҳои неки дӯстиву ҳамкориҳои чандинасра ҳаллу фасл шаванд.
Тарафҳо изҳори омодагӣ намуданд, ки Аҳдномаи қитъаҳои мувофиқатшудаи сарҳади ҳар ду кишварро дарбаргиранда ҳарчӣ зудтар дар порлумонҳои ҳар ду кишвар ба тасвиб расанд.
Баёни ақида (0) Санаи нашр: №: Мутолиа карданд: 2278
