илм
ТАЪСИСИ ПАРКИ ТЕХНОЛОГӢ ДАР НАЗДИ АКАДЕМИЯИ ИЛМҲО
Фарҳод Раҳимов, Президенти Академияи илмҳои кишвар, зимни нишасти матбуотӣ ба хабарнигорон иттилоъ дод, ки олимони академия нақша доранд баъди гирифтани патенти ихтироот истеҳсоли дастгоҳи барқи офтобиро ба роҳ монанд. Нархи ин дастгоҳ нисбат ба дастгоҳҳое, ки аз хориҷи кишвар ворид мешаванд, арзонтар хоҳад буд. Зикр гардид, ки олимон аз рӯи 70 мавзӯи илми бунёдӣ ва 31 мавзӯи амалӣ таҳқиқот бурда, натиҷаҳои назаррас ба даст оварданд. Натиҷаи корҳои илмию таҳқиқотии онҳо дар китобу монография ва мақолаҳои зиёди илмӣ дар дохилу хориҷи кишвар нашр гардидаанд. Дар ин муддат Корхонаи истеҳсоли азоти моеъ ба фаъолият оғоз намуд.
- Мо на танҳо хоҷагиҳои деҳқонии кишварро бо ин мавод таъмин мекунем, балки мехоҳем фурӯши онро дар хориҷи кишвар низ роҳандозӣ намоем, - гуфт Фарҳод Раҳимов.
Бо мақсади гирифтани заҳри мор ва аз он тайёр намудани дору, серпентария барои парвариши морҳои заҳрнок ташкил гардид. Фаъолияти мактабҳои илмӣ пурзӯр ва озмоишгоҳҳо қисман барқарор карда шуданд. Барои ҳамгироии илм бо истеҳсолот дар сохтори академия Парки технологӣ таъсис ёфт.
Олимон Д. Почоҷонов барои саҳми назаррас дар рушди илми химия ба ҷоизаи Бунёди байнидавлатии ҳамкориҳои башарии ИДМ «Ситораҳои иттиҳод» ва Д. Саймиддинов ҷоизаи Манучеҳри Фарҳангиро сазовор гардиданд.
Фарзонаи ФАЙЗАЛӢ
Баёни ақида (0) Санаи нашр: 12.07.2014 №: 133 Мутолиа карданд: 2350
