маориф
ДОНИШҶӮЁН БА ТАРИҚИ ЭЛЕКТРОНӢ ИМТИҲОН СУПУРДАНД
-Аз рӯи маълумоти пешакӣ наздики 7 ҳазор довталаб хоҳиши таҳсил дар факултаҳои гуногуни донишгоҳро доранд. Аммо донишгоҳ танҳо барои қабули 1250 довталаб ба Маркази миллии тестӣ ҷой пешниҳод намудааст, - гуфт дар нишасти матбуотӣ ба хабарнигорон Муъминҷон Шарипов, ректори Донишгоҳи давлатии тиҷорати Тоҷикистон.
Дар ин муддат китобҳои дарсӣ, дастурҳои методӣ, инчунин монографияҳои олимони донишгоҳ чоп шуданд. Заминаи моддӣ - техникии таълимгоҳ пурқувват гардида, шумораи синфхонаҳои компютерӣ ба 15 адад расид. Дар нимсолаи дуюми таҳсил донишҷӯён аз 82 фан дар Маркази тестии донишгоҳ ба тариқи электронӣ имтиҳон супурданд.
Устодони ҷавон дар риштаҳои магистратура ва аспирантураи донишгоҳҳои Кореяи Ҷанубӣ, Полша, Австрия, Испания, Русия таҳсил намуданд. Зинаи магистратураро 24 нафар хатм кард. Ҳамчунин рисолаҳои номзадӣ ва докторӣ ҳимоя гардиданд. Донишҷӯён дар олимпиада ва озмунҳои гуногуни ҷумҳуриявӣ, ки миёни донишҷӯён баргузор шуд, ҷойҳои намоёнро соҳиб шуданд. Дар мусобиқаи варзишӣ аз намуди бокс дар шаҳри Хуҷанд донишҷӯён Шоира Зулқайнарова ҷойи якум ва Раҳимзода Рухшона ҷойи дуюмро сазовор гардиданд.
Аз 1079 нафар хатмкунанда имсол 11 нафар дипломи аъло гирифт. 67 нафар бо сабабҳои гуногун ба имтиҳонҳо роҳ роҳ дода нашуд.
Фарзонаи ФАЙЗАЛӢ
Баёни ақида (0) Санаи нашр: 15.07.2014 №: 134 Мутолиа карданд: 1384
