мулоқотҳо
CASA - 1000 СОЛИ 2017 МАВРИДИ ИСТИФОДА ҚАРОР МЕГИРАД
21 июл Эмомалӣ Раҳмон, Президенти Ҷумҳурии Тоҷикистон, Хоҷа Осиф Муҳаммад – вазири федеролии об ва энергетикаи Ҷумҳурии Исломии Покистонро ба ҳузур пазируфт.
Бино ба иттилои Хадамоти матбуоти Президенти ҷумҳурӣ, дар ин дидор масоили ҳамкории гуногунҷанбаи ду кишвар, бахусус дар соҳаи энергетика мавриди баррасӣ қарор гирифт. Бар пояи гузориши манбаъ, зимни мулоқот таваҷҷуҳи асосӣ ба роҳҳои татбиқи босамари лоиҳаи минтақавии CASA-1000, ки аз Тоҷикистону Қирғизистон ба Афғонистону Покистон неруи барқ интиқол хоҳад дод, зоҳир шудааст.
Хоҷа Осиф Муҳаммад, вазири федеролии об ва энергетикаи Ҷумҳурии Исломии Покистон, ки баъд аз мулоқот бо Президенти мамлакат дар ҳузури хабарнигорон суҳбат мекард, аз таъсиси комиссияи муштараки Тоҷикистону Покистон доир ба рушди ҳамкорӣ дар соҳаи энергетика хабар дод. Зикр шуд, ки таҳияи санадҳову дарёфти роҳҳои бештари тавсеаи ҳамкориҳо ва истифодаи босамари иқтидорҳои мавҷудаи энергетикӣ, дар оянда интиқоли неруи барқ аз Тоҷикистон ба Покистон меҳвари асосии фаъолияти комиссияи муштарак хоҳад буд. Хоҷа Осиф Муҳаммад, изҳор дошт, ки феълан ҳайати комиссия талош дорад, то замони ташрифи Навоз Шариф, Сарвазири Покистон, ба Тоҷикистон, ки моҳи сентябри соли ҷорӣ дар назар аст, ҳуҷҷатҳои муҳими ҳамкорӣ омода ва барои тасвиб пешниҳод шаванд.
Вазири федеролии об ва энергетикаи Ҷумҳурии Исломии Покистон дар робита ба вазъи кунунии татбиқи лоиҳаи минтақавии CASA-1000 гуфт, ки феълан санадҳои ниҳоӣ миёни иштирокчиёни татбиқи ин тарҳ дар ҳоли мувофиқа қарор дошта, интизор меравад ояндаи наздик кашидани хатти интиқоли неруи барқ оғоз шавад. Дар ҳамин ҳол, қарор аст татбиқи лоиҳа то соли 2017 анҷом ёфта, мавриди истифода қарор гирад.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 23.07.2014 №: 140 Мутолиа карданд: 1313
