мулоқотҳо
СЕРГЕЙ ЛАВРОВ ДАР ҲУЗУРИ ПРЕЗИДЕНТ
30 июл Президенти кишвар Эмомалӣ Раҳмон вазири корҳои хориҷии Федератсияи Русия Сергей Лавровро ба ҳузур пазируфт.
Дар мулоқот масоили ҳамкории гуногунпаҳлуи Тоҷикистону Русия мавриди баррасӣ қарор гирифт.
Аз пайвастагии муколамаи сиёсии ду кишвар изҳори қаноат карда шуд. Аз ҷумла зикр гардид, ки имсол дар баробари сафари кории Президенти Тоҷикистон ба шаҳри Сочии Федератсияи Русия, табодули сафарҳои раисони палатаҳои порлумонҳо ба кишварҳои ҳамдигар, ҷаласаи Комиссияи муштараки байниҳукуматӣ доир ба ҳамкории иқтисодию тиҷоратӣ, анҷумани соҳибкорон, Рӯзҳои фарҳанги Русия дар Тоҷикистон ва мулоқотҳои зиёди дигар дар сатҳу зинаҳои гуногун баргузор шуданд. Барномаи навсозии муштараки Қувваҳои Мусаллаҳи Тоҷикистон тасдиқ гардид.
Изҳори боварӣ карда шуд, ки тасвиби санади дигари ҳамкории дуҷониба доир ба содироти маҳсулоти нафтии Русия ба Тоҷикистон бе ситондани боҷи содиротӣ низ ояндаи наздик ба нуқтаи ниҳоии худ мерасад. Ҷонибҳо ба мувофиқа омаданд, ки то охири соли равон барои баррасии ин ва дигар масоили ҳалталаб ҷаласаи навбатии Комиссияи муштараки байниҳукуматӣ доир ба ҳамкории иқтисодию тиҷоратӣ баргузор гардад.
Доир ба ҳифзи ҳуқуқи муҳоҷирони кории Тоҷикистон дар Русия ва густариши ҳамкорӣ дар соҳаҳои маориф, фарҳанг ва илму техника ҳам гуфтугӯйи судманд сурат гирифт.
Ҳамчунин атрофи рӯзномаи ҷаласаи навбатии вазирони корҳои хориҷии кишварҳои аъзои Созмони ҳамкории Шанхай ва ҳамоиши ояндаи сарони давлатҳои аъзои ин созмон, ки аввалӣ 31 июл ва дувумӣ моҳи сентябри соли равон дар шаҳри Душанбе баргузор мегарданд, мубодилаи афкор сурат гирифт.
Изҳори боварӣ карда шуд, ки ҳамоишҳои мазкур ва натиҷаҳои онҳо ба таҳким ва густариши ҳамкории гуногунҷанба, аз ҷумла дар самти таҳкими амнияту субот дар қаламрави масъулияти давлатҳои аъзои Созмони ҳамкории Шанхай нақши намоён хоҳанд гузошт.
Хотиррасон бояд намуд, ки имсол ҷаласаю ҳамоишҳои Созмони ҳамкории Шанхай дар ҳамаи сатҳу зинаҳо таҳти раёсати Ҷумҳурии Тоҷикистон ҷараён мегирад, зеро раисӣ дар ин созмон имсол бар души давлати мо аст.
Таваҷҷуҳи зиёд ҳамчунин ба масоили ҳамкорӣ дар доираи Созмони Аҳдномаи амнияти дастаҷамъӣ, аз ҷумла доир ба расондани кумакҳои техникӣ ба неруҳои сарҳадии Тоҷикистон ва таҳкими ҳифзи марзи давлатӣ бо Афғонистон, зоҳир гардид.
Баёни ақида (0) Санаи нашр: 1.08.2014 №: 146 Мутолиа карданд: 1278
