мулоқотҳо
ПОЁНИ ВАКОЛАТИ САФИРИИ ЭДУАРД АУЭР
6 август Эмомалӣ Раҳмон, Президенти Ҷумҳурии Тоҷикистон, роҳбари намояндагии Иттиҳоди Аврупо дар Тоҷикистон сафир Эдуард Ауэрро бинобар анҷом ёфтани фаъолияти сафириаш дар кишвари мо ба ҳузур пазируфт.
Пас аз мулоқот Эдуард Ауэр натиҷаҳои суҳбаташ бо Сарвари давлатро дар ҷамъи хабарнигорон матраҳ кард ва изҳор дошт, ки мо дар мулоқот ҳолати кунунӣ, дурнамои муносиботи Тоҷикистону Иттиҳоди Аврупо ва масоили минтақавию ҷаҳониро баррасӣ намудем. Бино ба гуфтаи ӯ, феълан ҳамкориҳои дуҷониба фарогир буда, рушди робитаҳои иқтисодию иҷтимоӣ, истифодаи захираҳои обӣ дар маркази таваҷҷуҳ қарор дорад. Ҳарду ҷониб ба раванди муколамаи созанда байни Тоҷикистон ва Иттиҳоди Аврупо баҳои баланд дода, нақши онро дар таҳкими ҳамкориҳои бештар муҳим унвон карданд.
Роҳбари намояндагии Иттиҳоди Аврупо дар Ҷумҳурии Тоҷикистон таъкид кард, ки дар зарфи чоруним соли охир ҳамкориҳои дуҷониба пурбору созанда буданд. Номбурда изҳори хушбинӣ намуд, ки ин раванд минбаъд низ идома ёфта, робитаи Тоҷикистон бо Иттиҳоди Аврупо тавсеаи бештар касб мекунад.
Бо он ки Эдуард Ауэр бинобар анҷом ёфтани муҳлати сафириаш Тоҷикистонро тарк мекунад, изҳор дошт, ки дар фурсати барояш муносиб ба манзури истироҳат ва баҳравар шудан аз табиати зебову нотакрори сарзамини мо ба Тоҷикистон хоҳад омад.
Қарор аст, роҳбари нави Иттиҳоди Аврупо дар Тоҷикистон моҳи сентябри соли ҷорӣ вориди Душанбе шавад.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 7.08.2014 №: 157 Мутолиа карданд: 1241
