энергетика
«РОҒУН» ҲАҶМИ ОБРО КАМ НАМЕКУНАД
Дар Маркази равобити «Пойтахт» муаррифии ҳисоботи «Баҳогузории таъсири экологӣ ва иҷтимоии лоиҳаи пешниҳодшудаи НБО-и Роғун барои намояндагони ҷомеаи шаҳрвандии шаҳри Душанбе» баргузор шуд. Мушовири ширкати «Пойри Энерҷӣ Лтд» Роберт Звахлен дар бораи ҷамъбасти натиҷаҳои таҳқиқи лоиҳаи пешниҳодшудаи НБО-и Роғун аз ҷониби Бонки ҷаҳонӣ маълумот дод.
Роберт Звахлен дар бораи ҳадафҳои лоиҳаи НБО-и Роғун сухан ронда, хотиррасон намуд, ки Бонки ҷаҳонӣ ҳоҳиши кишварҳои Осиёи Марказӣ ва Тоҷикистонро дар бобати гузаронидани ду тадқиқот оид ба баҳодиҳии қобили қабул будани НБО-и Роғун дастгирӣ намуд. Тадқиқотчиён ҷанбаҳои техникӣ-иқтисодӣ ва иҷтимоӣ-экологии лоиҳаро дар асоси меъёрҳои байналхалқӣ ва таҷрибаҳои ҷаҳонӣ дар асоси алтернативаҳои тавсияшаванда бо сатҳҳои танбашавии муътадили НБО-и Роғун дар баландии 1290 метр аз сатҳи баҳр ва иқтидори муайяншудаи 3200 МВт, НБО-и Роғун 1255 метр ва НБО-и Роғун 1220 метр аз сатҳи баҳр ҳаматарафа омӯхтанд. Тадқиқот собит намуд, ки сохтмон ва истифодаи НБО-и Роғун ҳаҷми меъёри обро барои давлатҳои поёноб кам намекунад, баръакс муҳлати истифодаи НБО-и Норак ва силсиланеругоҳҳои Вахшро хеле дароз менамояд.
Мушовир Роберт Звахлен дар асоси таҳлили баҳогузории таъсири иҷтимоӣ - экологӣ ва техникӣ - иқтисодии лоиҳаи пешниҳодшуда тавсияи Бонки ҷаҳониро дар бобати қобили қабул будани варианти «НБО-и Роғун 1290 метр аз сатҳи баҳр» тасдиқ намуд. «Мо фақат тавсия додем. Қарори идома додан ё надодани сохтмони НБО-и Роғун дар ихтиёри Ҳукумати Тоҷикистон аст», - ба пурсишҳои ҳозирон посух дода, таъкид кард мушовири ширкати «Пойри Энерҷӣ Лтд».
Э. НАЗАРОВ,
«Ҷумҳурият»
Баёни ақида (0) Санаи нашр: 20.08.2014 №: 164 Мутолиа карданд: 12189
