номаҳо
ОБИ ДАРИ ХОНАРО ҚАДР МЕБОЯД
Сарфи назар аз он ки духтари беморам аз шиддати дард аз ҳуш мерафт, табибони кишвари Русия бидуни пардохти 15-20 ҳазор доллар аз ҷарроҳӣ худдорӣ карданд.
Зиёда аз 20 сол ба саломатии духтарам осеби косахонаи сар, ки бар асари садама дар наврасӣ бардошта буд, таҳдид дошт. Он вақт табибон ягона роҳи наҷот - гузоштани ашёи муваққатиро дар дохили сараш зарур донистанд. Аммо то шиддат гирифтани дарди охир духтарам намедонист, ки дар сараш «чизе» аст. Хулоса, дар 27 - солагӣ дарди косахонаи сараш чунон шиддат гирифт, ки аз азияти он бемадор мешуду аз ҳуш мерафт. Талошҳои мо барои табобат бенатиҷа буд. Чун духтарам дар Русия бо оилааш мезист, ба назди табибони ин кишвар рафтанд. Вале ҳеҷ як аз усули муолиҷаи табибони Русия шиддати дардро кам карда натавонист. Табибони шаҳри Маскав ягона роҳ, гузаронидани ҷарроҳиро пешниҳод карданд.
Онҳо розигии моро барои анҷом додани амалиёти ҷарроҳӣ интизор буданд, то ҳангоми рух додани ҳодисае онҳоро гунаҳкор накунем. Табиист, ки сар ва ҷарроҳии он хеле нозук аст, аз ҳама узви муҳими инсон мебошад. Аммо, вақте ки арзиши ҷарроҳиро фаҳмидем… Табибон барои чунин амалиёт 15-20 ҳазор доллари амрикоӣ талаб карданд. Ноилоҷ мондем. Бемор ҳам ин ҳолатро дарк кард, ки гуфт: «модар, бояд ба Ватан баргардем ва зуд».
Ба Ватан баргашта, дар пайи ҷустуҷӯи ҷарроҳони шинохта шудем, ҳарчанд ки духтарам дигар аз шиддати беморӣ ҳатто аз ҳарф задан монда буд. Яке аз дӯстон тавсия дод, ки ҷарроҳони муваффақи худамон кам нестанд. Ному насаби ҷарроҳро гуфтанд ва мо ба назди он табиб рафтем.
Табибони Русия мегуфтанд, ки дар сари бемор чурра «грижа» ҳаст ва косахонаи сари ӯ ба ҷарроҳии вазнин ва боэҳтиёт ниёз дорад. Зеро тӯли ин солҳо устухонҳои сар ба истилоҳ каҷ инкишоф ёфта буданд.
Ҷарроҳии мазкурро дар ҷумҳурии худамон падару писар Раҳмон Муродов ва Раҳим Муродов дар беморхонаи хусусии «Балх»-и шаҳри Душанбе бо харҷи бамаротиб камтар аз пардохти маблағи пешниҳодкардаи табибони Маскав анҷом доданд. Ҳоло духтарам Бибиқурайш худро хуб ҳис мекунад ва аз ранҷи чандсола раҳо шуд. Ин муъҷизае буд, ки мо ба ҳакиқати он бовар кардем.
Давлатмоҳ ҒУЛОМШОЕВА,
сокини шаҳри Хоруғ
Баёни ақида (0) Санаи нашр: 3.09.2014 №: 172 Мутолиа карданд: 3298
