мулоқотҳо
МУЛОҚОТУ МУЗОКИРОТИ САТҲИ ОЛИИ ТОҶИКИСТОНУ ЧИН
13 сентябр ҳузури Раиси Ҷумҳурии Мардумии Чин Си Ҷинпин дар Тоҷикистон дар доираи барномаи нахустин сафари давлатии ӯ ба кишвари мо идома ёфт.
Маросими бошукӯҳи истиқболи расмии меҳмони олимақом дар назди Қасри миллат баргузор гардид. Ба ин муносибат дар саҳни Қасри миллат ҷузъу томҳои Горди фахрӣ ва оркестри асбобҳои нафасӣ саф оростанд.
Раиси Ҷумҳурии Мардумии Чин Си Ҷинпинро Сарвари давлати Тоҷикистон Эмомалӣ Раҳмон истиқбол гирифта, ба болои минбари ифтихорӣ даъват намуд.
Маросими истиқболи расмӣ бо гузориши фармондеҳи Горди фахрӣ, садо додани сурудҳои миллии ду давлат ва 21 шиллик аз тӯпхонаҳо, ки танҳо хоси сафарҳои давлатӣ аст, гузаштани сарони давлатҳо аз назди сафи сарбозон, ба ҷо овардани эҳтиром ба Парчами давлатии Тоҷикистон, арзи саломи меҳмони воломақом ба низомиён ва шиносоӣ бо ҳайатҳои расмии ду кишвар баргузор гардид.
Ин маросими бошукӯҳ бо расми гузашти низомии ҷузъу томҳои Горди фахрии Тоҷикистон аз назди сарони ду давлат ба поён расид.
Баррасии масоили вобаста ба муносиботи дӯстӣ ва ҳамкории гуногунҷанбаи ду кишвар дар мулоқоти хосаи сарони ду давлат оғоз ёфта, дар музокироти расмии ҳайатҳои васеи ду ҷониб идома ёфт. Дар мулоқот масоили вобаста ба ҳамшарикии стратегии ду кишвари ҳамсоя дар бахшҳои сиёсат, амнияти минтақавӣ, иқтисоду тиҷорат, сармоягузорӣ, кишоварзӣ, маориф, илму техника ва фарҳанг баррасӣ шуд.
Бо қаноат изҳор гардид, ки ҳаҷми солонаи гардиши мол миёни 2 кишвар аз 2 миллиард доллари амрикоӣ гузаштааст ва умед аст, ки тайи 5 соли оянда ин нишондиҳанда аз 3 миллиард доллари амрикоӣ афзун мешавад.
Пас аз анҷоми мулоқоту музокироти расмӣ 16 санади нави ҳамкорӣ ба имзо расид, ки ин аз рушди бесобиқаи муносиботи дӯстӣ ва ҳамкории бисёрҷанбаи ду кишвари ҳамсоя гувоҳӣ медиҳад:
Эъломияи муштарак миёни Ҷумҳурии Тоҷикистон ва Ҷумҳурии Мардумии Чин оид ба таҳкими минбаъдаи ҳамкории шарокати стратегӣ;
Барномаи ҳамкорӣ миёни Ҷумҳурии Тоҷикистон ва Ҷумҳурии Мардумии Чин барои солҳои 2015-2020;
Аҳднома миёни Ҷумҳурии Тоҷикистон ва Ҷумҳурии Мардумии Чин дар бораи экстрадитсия;
Аҳднома миёни Ҷумҳурии Тоҷикистон ва Ҷумҳурии Мардумии Чин оид ба боздоди маҳкумшудагон;
Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба ҳамкории иқтисодиву техникӣ (грант ба маблағи 300 млн.юани хитоӣ);
Созишномаи қолабӣ миёни Вазорати молияи Ҷумҳурии Тоҷикистон ва Вазорати тиҷорати Ҷумҳурии Мардумии Чин дар бораи ба ҷониби Тоҷикистон додани қарзи имтиёзноки содиротӣ;
Ёддошти тафоҳум оид ба пешбарии таъсиси «Навори иқтисодии роҳи абрешим» миёни Кумитаи давлатӣ оид ба рушд ва ислоҳоти Ҷумҳурии Мардумии Чин ва Вазорати рушди иқтисод ва савдои Ҷумҳурии Тоҷикистон;
Ёддошти тафоҳум миёни Вазорати кишоварзии Ҷумҳурии Тоҷикистон ва Вазорати кишоварзии Ҷумҳурии Мардумии Чин оид ба бунёди Маркази аграрии намоиши технологияҳои инноватсионии Чин дар Тоҷикистон;
Созишномаи ҳамкорӣ миёни Академияи илмҳои Ҷумҳурии Тоҷикистон ва Академияи илмҳои Ҷумҳурии Мардумии Чин;
Созишнома миёни Вазорати маориф ва илми Ҷумҳурии Тоҷикистон ва Дафтари асосии Донишкадаи Конфутсий оид ба ҳамкорӣ дар бунёди маркази Конфутсий;
Созишнома оид ба усулҳои асосӣ миёни Ҳукумати Ҷумҳурии Тоҷикистон ва «Транс-Таджик-Газ пайплайн компани Лимитед»;
Созишномаи қарзӣ миёни Тоҷиктрансгаз ва Ширкати «Транс-Азия Пайплайн»;
Созишномаи қарзӣ миёни Бонки давлатии амонатгузории «Амонатбонк» ва Бонки давлатии рушди Чин;
Ёддошти тафоҳум оид ба ҳамкорӣ аз рӯи лоиҳаи «Минтақаи саноатии Тоҷикистон ва Чин» дар соҳаи саноати кӯҳӣ миёни «Ширкати байналмилалӣ оид ба захираҳои Тачен»-и ноҳияи мухтори Синзян Уйғур ва Вазорати саноат ва технологияҳои нави Ҷумҳурии Тоҷикистон;
Созишнома миёни «Агроинвестбонк»-и Ҷумҳурии Тоҷикистон ва Бонки кишоварзии Чин оид ба ҳамкорӣ;
Созишномаи сармоягузорӣ миёни Ҳукумати Ҷумҳурии Тоҷикистон ва ширкати чинии «Хуаксин Семент ЛТД» оид ба сохтмон ва ба истифода додани хати 2 ва 3-и корхонаҳои истеҳсоли семент дар ноҳияҳои Бобоҷон Ғафуров ва Данғара;
Ёддошти тафоҳум дар бораи ҳамкорӣ миёни Агентии беҳдошти замин ва обёрии назди Ҳукумати Ҷумҳурии Тоҷикистон ва Корпоратсияи истеҳсоли масолеҳи сохтмонии Синзян.
Зимни нишасти матбуотӣ сарони ду давлат ба натиҷаҳои мулоқоту музокироти сатҳи олӣ баҳои баланд дода, аз ҷумла ба имзо расидани бастаи калони санадҳои нав, хусусан Эъломияи муштарак оид ба таҳкими минбаъдаи ҳамкории шарокати стратегӣ ва Барномаи ҳамкорӣ барои солҳои 2015 - 2020-ро намунаи хуби ҳусни ҳамсоягии ду кишвари ҳамсоя ва сатҳи боварию эътимод маънӣ доданд.
Баёни ақида (0) Санаи нашр: 16.09.2014 №: 180 Мутолиа карданд: 1367
