мулоқотҳо
ТАҲКИМИ ҲАМКОРИҲОИ АМНИЯТӢ
Дар мулоқоти Эмомалӣ Раҳмон, Президенти Ҷумҳурии Тоҷикистон, бо Николай Патрушев, котиби Шӯрои амнияти Федератсияи Русия, масоили ҳамгироии ду кишвар дар бахши амният, ки рӯзи 17 октябр дар Душанбе сурат гирифт, баррасӣ шудааст.
Дар ин бора Николай Патрушев баъд аз вохӯрӣ бо Сарвари давлат ба хабарнигорон иттилоъ дод. Ӯ, аз ҷумла гуфт, ки «Мо бо Ҷаноби Президент масоили амнияти байналмилалӣ, минтақа ва рушди ҳамкориҳои дуҷонибаро дар мубориза бо таҳдидҳои феълӣ ба амнияти кишварҳо баррасӣ кардем».
Бино ба гуфтаи котиби Шӯрои амнияти Федератсияи Русия, дар мулоқот ҳамчунин ҳолати кунунӣ ва дурнамои вазъ дар Афғонистон мавриди таваҷҷуҳ қарор гирифта, оид ба таҳкими марз ва пурзӯр намудани ҳифзи сарҳади Тоҷикистон бо ин кишвар гуфтугӯи судманд анҷом шудааст. Ҳамоҳангсозии фаъолият дар амри ҷилавгирӣ аз хатарҳои эҳтимолӣ, мубориза бо терроризму ифротгароӣ, пешгирии гардиши ғайриқонунии маводи мухаддир ва таҳкими амнияти иттилоотӣ дар меҳвари гуфтугӯ қарор гирифтааст.
Николай Патрушев, дар поёни суҳбаташ бо хабарнигорон изҳор намуд, ки дар ҳоли бештар гардидани таҳдиду хатарҳои ҷомеаи имрӯз, мо ба тақвияти ҳамкориҳои бештари амниятӣ ниёз дорем.- Аз ин рӯ, талош хоҳем кард, ки фаъолияти мо дар заминаи татбиқи санаду созишномаҳои ҳамкории ду кишвар оид ба ҳифзи амният самаранок бошад, - гуфт котиби Шӯрои амнияти Федератсияи Русия.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 18.10.2014 №: 203 Мутолиа карданд: 1507
