порлумон
ҚОНУН ДАР РӮҲИЯИ ИНСОНДӮСТӢ ВА РАҲМУ ШАФҚАТ ПЕШНИҲОД ШУД
Дар ҷаласаи навбатии Маҷлиси намояндагони Маҷлиси Олӣ, ки таҳти раёсати Шукурҷон Зуҳуров, раиси Маҷлиси намояндагон, гузашт, лоиҳаи Қонуни Ҷумҳурии Тоҷикистон «Дар бораи авф» баррасӣ гардид.
Шерхон Салимзода, Прокурори генералии Ҷумҳурии Тоҷикистон, зимни ташреҳи қонуни мазкур иброз дошт, маҳз табиат ва хислати неки инсонии Сарвари давлат аст, ки мо дар даврони истиқлолияти кишвар шонздаҳумин қонуни авфро мавриди баррасӣ қарор медиҳем. Президенти мамлакат бо истифода аз ҳуқуқи конститутсионии худ дар рӯҳияи инсондӯстӣ, раҳму шафқат ва бо мақсади бахшидани гуноҳҳо дар арафаи 20-солагии қабули Конститутсияи (Сарқонуни) Ҷумҳурии Тоҷикистон, лоиҳаи қонуни мазкурро ба баррасии Маҷлиси намояндагон пешниҳод намуд. Қабул ва татбиқи ин қонун ҷиҳати ислоҳ ва тарбияи маҳкумшудагон ва дигар шахсони ҷиноятсодирнамуда таъсири хуби мусбат мерасонад.
Лоиҳаи қонун аз 24 модда иборат буда, ҳолатҳои авф шудани маҳкумшудагон ва шахсони ҷиноятсодирнамуда, аз ҷумла озод кардан аз адои ҷазои маҳрум сохтан аз озодӣ, озод кардан аз адои ҷазоҳои дигари ба маҳрум сохтан аз озодӣ алоқаманд набуда, озод кардан аз ҷавобгарии ҷиноятӣ ва кам кардани муҳлати адонагардидаи ҷазои маҳрум сохтан аз озодии маҳкумшудагонро муайян менамояд.
Лоиҳаи қонун пешбинӣ намудааст, ки шахсони аз чор се ҳиссаи ҷазоро дар ҷойҳои маҳрумӣ аз озодӣ адо карда, ҳамчунин новобаста аз муҳлати ҷазои таъйиншуда ва аз адои ҷазоҳои дигари ғайриҳабсӣ занон, ноболиғон, мардони аз 55 - сола боло, иштирокчиёни Ҷанги Бузурги Ватанӣ ва амалиётҳои ҷангӣ дар дигар давлатҳо ва муқовиматҳои сиёсиву ҳарбӣ дар Тоҷикистон, зарардидагони садамаи Чернобил, маъюбони гурӯҳҳои I, II, III, шахсони гирифтори бемориҳои саратон, сил, узвҳои нафас ва шуш, шахсоне, ки бо мукофотҳои давлатии Иттиҳоди Шӯравӣ, ҶШС Тоҷикистон ва Ҷумҳурии соҳибистиқлоли Тоҷикистон сарфароз гардидаанд, шахсоне, ки аз хизмати ҳатмии ҳарбӣ саркашӣ намудаанд ё худсарона қисми ҳарбиро тарк кардаанд ва шаҳрвандони хориҷӣ озод мешаванд.
Прокурори генералӣ зикр кард, ки айни ҳол дар муассисаҳои ислоҳи 112 нафар маҳбусони гирифтори чунин бемориҳо адои ҷазо менамоянд.
Мавсуф таъкид намуд, афроде, ки дар маҳбасанду дар гузашта ду бор ё беш аз он авф шудаанд, қонуни нав ба онҳо дахл надорад. Ҳамчунин занону ноболиғоне, ки барои хиёнат ба Ватан, куштор ё амалҳои террористӣ маҳкум шудаанд, авф намешаванд.
Мувофиқи маълумоти пешакӣ қонуни мазкур нисбати беш аз 10 ҳазор гумонбаршуда, айбдоршуда ва маҳкумшуда татбиқ мешавад.
Вакилон Маҳмадалӣ Ватанов, Убайдулло Давлатов, Саодат Амиршоева, Шодӣ Шабдолов таъкид карданд, ки мақомоти иҷроияи маҳаллии ҳокимияти давлатии шаҳру ноҳияҳо ба раҳошудагон ёрӣ расонда, барои бо кор таъмин намудани онҳо мусоидат намоянд.
Мунаввари САФАР,
«Ҷумҳурият»
Баёни ақида (0) Санаи нашр: 30.10.2014 №: 211 Мутолиа карданд: 1694
