порлумон
Ё ВАЗИФА Ё ВАКИЛӢ?
Дар ҷаласаи навбатии Маҷлиси намояндагон, ки таҳти раёсати Амиршо Миралиев, муовини аввали Раиси Маҷлиси намояндагон, гузашт ба қонунҳои Ҷумҳурии Тоҷикистон тағйиру иловаҳо ворид гардиданд.
Бибидавлат Афзалшоева, вакили порлумон, зимни баррасии лоиҳаи Қонуни конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи интихоботи вакилон ба маҷлисҳои маҳаллии вакилони халқ» иброз дошт, ки он ба мақсади такмил ва бартараф сохтани мухолифатҳои дохилии қонун, мутобиқ намудан бо меъёрҳои Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ва, инчунин ҷиҳати иҷрои тавсияҳои нозирони дафтари ниҳодҳои демократӣ ва ҳуқуқи инсони Созмони амният ва ҳамкорӣ дар Аврупо доир ба интихоботи порлумони Ҷумҳурии Тоҷикистон дар соли 2010 таҳия гардидааст. Тибқи лоиҳаи мазкур ба 7 моддаи он дар бораи интихоботи вакилон ба маҷлисҳои вакилони халқ тағйиру иловаҳо ворид гардиданд. Аз ҷумла ба моддаи 10 оид ба ташкили комиссияҳои вилоятӣ, шаҳрӣ, ноҳиявӣ, ба моддаи 12 оид ба ташкили комиссияҳои ҳавзавии интихобот ва шакли бюллетенҳо, моддаҳои 30, 40, 41, 42 дар бораи тартиби овоздиҳӣ ва аз ҷониби интихобкунандагон пур кардани бюллетенҳои интихобот мушаххас гардидааст. Инчунин доираи шахсоне, ки дар як вақт вакили маҷлисҳои дахлдори маҳаллии вакилони халқ буда наметавонанд, аниқ муайян шудааст. Чунончи, моддаи 26 қонуни амалкунанда, яъне талабот аз номзадҳо ба вакилӣ ба мафҳумҳои қонунҳои Ҷумҳурии Тоҷикистон «Дар бораи низоми мақомоти идоракунии давлатӣ», «Дар бораи мақомоти давлатии ҳокимияти давлатӣ», «Дар бораи прокуратура» мутобиқ карда шуд.
Хусусан қисми дуюми ҳамин модда дар таҳрири зайл оварда шудааст: «Аъзои Ҳукумати Ҷумҳурии Тоҷикистон, судяҳо, прокурорҳо, роҳбарони сохторҳои мақомоти иҷроияи маҳаллии ҳокимияти давлатӣ ва муовинҳои онҳо, дар як вақт вакили маҷлиси маҳаллии вакилони халқи дахлдор буда наметавонанд».
Ӯ зикр кард, ки ба шарте онҳо ҳамчун номзад ба қайд гирифта мешаванд, ки дар аризаи худ ҳангоми номзад интихоб шудан аз вазифа рафтанашонро изҳор карда бошанд.
Ҳамчунин ба қонунҳои Ҷумҳурии Тоҷикистон, аз ҷумла «Дар бораи мақомоти амнияти миллии Ҷумҳурии Тоҷикистон», «Дар бораи мубориза бар зидди экстремизм, (ифротгароӣ), «Дар бораи мудофиаи гражданӣ» тағйиру иловаҳо ворид гардиданд.
С. МУНАВВАР,
«Ҷумҳурият»
Баёни ақида (0) Санаи нашр: 11.11.2014 №: 219 Мутолиа карданд: 1355
