мулоқотҳо
ҲАВАСМАНДИИ ҶОНИБҲО БА ТАҲКИМ ВА ГУСТАРИШИ ҲАМКОРӢ
17 ноябр Президенти кишвар Эмомалӣ Раҳмон президенти Бонки аврупоии навсозӣ ва рушд Сума Чакрабартиро ба ҳузур пазируфт.
Дар вохӯрӣ масоили марбут ба рушди ҳамкории Тоҷикистон бо ин муассисаи бонуфузи молиявӣ баррасӣ шуд.
Чунонки зикр гардид, давоми солҳои ҳамкорӣ ин бонк дар Тоҷикистон ба маблағи зиёда аз 700 миллион доллари амрикоӣ созишномаҳо бо Ҳукумати мамлакат, бахши хусусӣ ва бонкҳои тиҷоратӣ ба имзо расонидааст, ки барои татбиқи лоиҳаҳои муҳими сармоягузорӣ дар бахшҳои мухталифи иқтисод, инчунин ба ташаккули иқтидор ва рушди институтсионалӣ равона карда шудаанд. Ҳоло сандуқи лоиҳаҳои фаъоли ин бонк ба маблағи умумии зиёда аз 500 миллион доллар дар бахшҳои энергетика, обтаъминкунию хоҷагии манзилӣ, низоми бонкдорӣ ва бахши хусусӣ амалӣ мешаванд.
Бо ибрози қаноатмандӣ аз ҳамкории бисёрсолаи Тоҷикистону Бонки аврупоии навсозӣ ва рушд ҳамзамон изҳори боварӣ гардид, ки дастгирии рушди иҷтимоию иқтисодии кишвари мо, бахусус ҷиҳати коҳиш додани таъсири манфии омилҳои беруна, минбаъд низ босамар идома мегардад.
Ҳар ду ҷониб ҳавасмандии амиқи худро ба таҳким ва густариши ҳамкории минбаъда низ таъкид намуданд.
Баёни ақида (0) Санаи нашр: 18.11.2014 №: 224 Мутолиа карданд: 1326
