номаҳо
АГАР ХАТО КАРДААМ…
Чун аз шаҳри Душанбе ба ноҳияҳои дурдаст, хусусан ноҳияҳои вилояти Хатлон сафар мекунӣ, дар баъзе аз қисматҳои роҳ бо кормандони БДА рӯ ба рӯ мешавӣ. Ин, албатта, табиист. Аммо бисёр вақт онҳо на дар қароргоҳҳои муқарраршуда меистанд. Дар ҷойҳое қарор мегиранд, ки кас ҳеҷ тасаввур карда наметавонад. Гоҳ-гоҳ ҷойҳояшонро иваз мекунанд. Дар даст «радар» доранд, гоҳе танҳо ва гоҳе ду нафаранд. Мо мефаҳмем, ки онҳо вазифаашонро иҷро мекунанд ва бояд дар назди нақбҳо низ биистанд. Тааҷҷубамон аз нафаронест, ки рутбаашон «майор» аст. Албатта, «майор» низ бояд «радар» дошта бошад ва мошинҳоеро, ки суръати ҳаракаташонро баланд мекунанд, нигоҳ бидораду ҷарима бибандад. Аммо ман фикр мекунам, ки ин амалро дигар кормандони соҳа низ, ки рутбаашон баланд нест, иҷро намуда метавонанд. «Майор» бояд ба иҷрои вазифаҳои муҳимтару мураккабтар машғул бошад. Охир пештар чунин набуд. Ё ман дар ин масъала хато мекунам? Агар хато кардаам, пешакӣ узр мепурсам.
Н.АМИНЗОДА, шаҳри Чкалов
Баёни ақида (0) Санаи нашр: 11.12.14 №: 243 Мутолиа карданд: 5578
