номаҳо
ДАР ТАВИЛДАРА ПАРВОИ КОРАФТОДА НАДОРАНД
Солҳост қалам ба даст нагирифта будам. Вале тасодуф буд ё чизе дигар, ки баъди нашри матлабе бо номи «Мудири худписанд» дар рӯзномаи «Ҷумҳурият» ночор қалам ба даст гирифтам.
Дар хусуси мудири шуъбаи маорифи ноҳияи Тавилдара Шодӣ Раҳмонов чизе гуфтанӣ нестам. Ҳамкор аст. Аммо ин ҷо масоили рӯзмарраи зиндагии мардуми ин гӯшаи аз назарҳо дури кӯҳистонро каме бошад ҳам, мехоҳам рӯи коғаз биоварам.
Банда солҳои 1988 – 1992 ҳамчун хабарнигори мустақили «Ҷумҳурият» дар бораи аз сари нав барқарор шудани ноҳия бо номҳои «Тавилдара диёри куҳанобод», «Эҳёи Тавилдара зарур аст» матолиб ба табъ расонда будам. Шояд ҳиссае барои барқароршавии ноҳия гузошта бошам. Аммо…
Маркази ноҳия аз охирон деҳаи мо дар масофаи 43 километр дуртар воқеъ аст ва кирокашҳо барои ба ин ҷо расонидан 40 сомонӣ роҳкиро мегиранд. Бовар кунед барои ҳуҷҷатгузории як фурӯшгоҳ шаш моҳи расо саргардон шудам. Барои як хулосаи имзои раиси об панҷ маротиба рафта омадам. Ва бисёр корафтодаҳо барои ночизии коре ҳафтаҳо дар ба дари идораҳо гашта, кореро ба сомон расонида наметавонанд. «Шеф» нест, пагоҳ биё», - мегӯяд котиба ва намедонад барои омадани пагоҳ боз 40 сомонӣ роҳкиро додан даркор аст.
Хулоса, кадом камбудиро ба қалам биоварам? Корат на дар бонк иҷро мешаваду на дар назди лоиҳакашу заминсози ноҳия. Дар ин хусус устод шодравон Ашӯр Сафар хеле хуб гуфтааст:
Дарди дилро дилбари дилдор медонад фақат,
Ҳолати беморро бемор медонад фақат.
Барои ҳамин ҳанӯз ҳам аксар мардуми мо бо таассуф мегӯянд: «Кош аз ҳайати собиқ Комсомолобод (Нуробод) намебаромадем. Онҳо одамони дигар буданд. Дар як маротиба «хуш омадед» гуфта, мушкилатонро ҳал мекарданд. Аз мо чӣ? Даҳ бор равӣ ҳам, касе парво надорад».
Дар фарҷом ҳаминро илова карданиам, ки шумораи аҳолии ноҳияи мо нисбат ба дигар ноҳияҳо кам аст. Чӣ дорад? Якчанд муассисаи таълимӣ, бунгоҳҳо ва фурӯшгоҳҳои қади роҳ. Ҳар вақте ки мутасаддиёни идораҳои дахлдори ноҳия биоянд, албатта, тафтишро аз мактабу бунгоҳҳо ва фурӯшгоҳҳо оғоз мекунанд. Мекӯшанд, то камбудиро биёбанду дастхолӣ бознагарданд. То охирон тангаи зардакатро кашида мегиранд.
Боду ҳавои Тавилдара ҳамин гуна аст. Лекин фаромӯш накунед, одамони мушфиқу меҳрубонаш низ кам нестанд.
Муҳаммадшоҳи МИРЗО,
деҳаи Дамоби Ҷамоати деҳоти Чилдара
Баёни ақида (0) Санаи нашр: 12.12.14 №: Мутолиа карданд: 5414
