номаҳо
ҒАМХОРИРО ЭҲСОС МЕКУНЕМ
Ман ҳамчун собиқадори меҳнати мақомоти корҳои дохилии кишвар барои барқарор кардани саломатӣ, чанд сол инҷониб аз ноҳияи Файзобод ба шаҳри Хуҷанд рафта, дар муассисаи давлатии тандурустии «Маркази солимгардонӣ ва барқарорсозии саломатии маъюбон ва иштирокчиёни Ҷанги Бузурги Ватанӣ» фароғат мебарам ва саломатиам беҳтар мешавад.
Шароитҳои истироҳату табобат дар ин муассиса хеле хуб аст. Тозаю озодагӣ ва муомилаю муносибати ғамхоронаи кормандони он ба кас рӯҳу неруи тоза ато менамояд. Сарварии ин муассисаи табобатию солимгардонӣ ба дӯши Соҳиб Исломов вогузор аст. Ӯ 11 сол боз сардухтур буда, таҳти роҳбариаш дар ин ҷо корҳои зиёди ободонӣ анҷом ёфта, сатҳи хизматрасонӣ бомаром боло меравад. Зимни суҳбат бо ин роҳбари кордону марди инсондӯст маълум гардид, ки танҳо дар давоми шаш моҳи соли ҷорӣ ин муассиса 919 нафар мизоҷро қабул кардааст, ки аксар маъюбону иштирокчиёни Ҷанги Бузурги Ватанӣ мебошанд. Онҳо аз тамоми гӯшаю канори кишвар ба ин ҷо омада, саломатиашонро барқарор карда, ба хонаҳояшон баргаштанд. Баъди анҷоми фароғату табобати имсола тасмим гирифтам тавассути рӯзномаи бонуфузи «Ҷумҳурият» арзи сипоси худро баён кунам. Чанд нафари дигар, аз ҷумла собиқадорони меҳнат Раҷабалӣ Сафаров, Бибиоиша Ғиёсова аз ноҳияи Рӯдакӣ, Ҷумъабой Беков, Маҳбуба Бекова аз шаҳри Душанбе, иброз намуданд, ки аз пазироӣ ва муносибату табобати роҳбарону кормандони муассисаи давлатии тандурустии «Маркази солимгардонӣ ва барқарорсозии саломатии маъюбон ва иштирокчиёни Ҷанги Бузурги Ватанӣ»-и шаҳри Хуҷанд розию қаноатманданд.
Муҳаммадулло БЕКОВ,
собиқадори меҳнат
Баёни ақида (0) Санаи нашр: 18.12.14 №: 248 Мутолиа карданд: 5307
