номаҳо
ЗАМОНИ КОҒАЗБОЗӢ НЕСТ
Ҳар омӯзгор вазифадор аст, ки пеш аз дохил шудан барои тадрис ба синфхона «конспект» - ашро бо шахси масъул нишон бидиҳаду иҷозат бигирад. Агар омӯзгор рӯзе чор соат дарс бигузарад, бояд ҳатман ба чор варақ ё худ ҳашт саҳифа «конспект» бинависад. Акнун ҳисоб бикунем, ки дар кишвар чӣ қадар омӯзгор дорему дар як рӯз чӣ қадар коғаз сарф мешавад. Дар як моҳ он чанд тоннаро ташкил медиҳад. Дар як сол чӣ?
Ҷойи таассуф дар он аст, ки баъзе аз масъулон ин навиштаҳоро намехонанд ва агар ҳам хонанд, на ҳамаи онҳоро мефаҳманд. Ба ҷуз ин баъзе аз омӯзгорон собиқаи зиёди корӣ доранд ва ҳар мавзӯъро азёд медонанд. Фикр мекунам, ки барои онҳо зарурати «конспектнависӣ» вуҷуд надорад. Инчунин бархе аз омӯзгорон дар кабинетҳои фаннӣ ба компютер таъминанд. Аз ин рӯ, метавонанд бо истифода аз он коғазро сарфа намоянд. Охир мо коғазро аз хориҷи кишвар мехарем ва нархи он сол ба сол дар ҳоли боло рафтан аст.
Бисёр хуб мешуд, ки агар ин масъала бо иштироки мутахассисон баррасӣ мегардид ва роҳҳои беҳтари ҳалли онро пайдо менамуданд. Охир дигар замони коғазбозӣ нест.
Ҳ. ФАЙЗУЛЛОЕВ, ноҳияи Рӯдакӣ
Баёни ақида (0) Санаи нашр: 6.01.2015 №: 3 Мутолиа карданд: 1444
