номаҳо
КОСАИ САБРАМОН ЛАБРЕЗ АСТ
Соли 2008 ба мо – эҳтиёҷмандон замини наздиҳавлигӣ доданд. Дар он хона ва дигар биноҳои заруриро сохтем. Баҳори соли 2010 сел онҳоро хароб кард, балки ҳамаро бо худ бурд. Комиссияи махсус ин ҳолатро санҷида баромад ва моро ба рӯйхати зарардидагон ворид намуд. Раиси ноҳия дар асоси он аз 10 июни соли 2010, таҳти рақами 269 қарор ба тасвиб расонд, ки ба мо замини наздиҳавлигӣ дода шавад. Ҳукумати кишвар барои эҳтиёҷмандони замини наздиҳавлигии шаҳри Исфара 20 га ҷудо намуд. Аммо аз ин заминҳо ба мо надоданд. Соли 2012 бо раиси вақти вилоят оид ба ин масъала муроҷиат кардем. Ба масъулон супориш дод, ки он мусбат ҳал гардад. Аммо то ба ҳол масъалаи мазкур роҳи ҳалли худро наёфтааст. Баҳонаву сабабҳои зиёд пеш меоранду ҳеҷ не, ки ба ваъда вафо бикунанд. Барои мо ҳар рӯз ғанимату қимат мебошад. Охир ҳар рӯз мебинем, ки нархи масолеҳи сохтмонӣ гаронтар мешавад. Бо ин ҳол мушкили мо, бештар мегардад. Аз ин рӯ, ба гӯшаи «Розу ниёз» - и «Ҷумҳурият» муроҷиат менамоем. Шояд бо хондани ин нома масъулон дар бораи мо бияндешанд, ки косаи сабрамон лабрез гардидааст.
К. ШАРОФОВ, С. ТОШХӮҶАЕВ, М. ШАРИФОВА,
Х.САФАРОВ, Д.НАЗИРОВ, Х.РАЗЗОҚОВ, М.ТУРДИБЕКОВА,
деҳаи Ворухи шаҳри Исфара
Баёни ақида (0) Санаи нашр: 6.01.2015 №: 3 Мутолиа карданд: 1490