номаҳо
ИЛТИМОС, БА Ӯ ЗАНГ НАЗАНЕД!
Ба телефони ҳамроҳии шумо ҳатман чунин паём ирсол медоранд: «Илтимос, ба ман занг занед!». Бале, ин паём ба забони тоҷикӣ мебошад. Шумо мепиндоред, ки яке аз наздиконатон ин дархостро намудааст. Аз ин рӯ, мехоҳед зуд ба ӯ занг бизанед ва сабаби ирсоли паёмро дарёбед. Шояд ҳам бупиндоред, нафаре, ки ин дархостро аз шумо намуда, вазъи иқтисодияш хуб нест. Ба ҷуз ин мехоҳад бифаҳмад, ки дар ин вақт кӣ барои чӣ бо илтимос дархост мекунад.
Андаке сабр кунед. Саросема нашавед. Ба рақам таваҷҷуҳ кунед. Агар рақами шинос нест, илтимос, ба ӯ, соҳиби рақам занг назанед. Албатта, ман ҳам ҳанӯз дарнаёфтаам, ки ин «илтимоскунанда» кӣ аст, аммо фиребашонро хӯрдаам. Ҳамин ки ба рақами онҳо пас аз дархосташон занг бизанед, аз 6 - 7 долларе, ки дар хазинаи телефонатон ҳаст, маҳрум мешавед.
Бовар дорам, ки масъулон дар ҷустуҷӯи ин гуна қаллобону фиребгарон меафтанд ва онҳоро меёбанду сазои муносиб медиҳанд. Вале пеш аз он бар нафари ношиносе, ки ба чунин хоҳиш ба шумо рӯ меорад, илтимос, занг назанед.
Аброри АБДУЛМАҶИД,
шаҳри Душанбе
Баёни ақида (0) Санаи нашр: 6.01.2015 №: 3 Мутолиа карданд: 1599