номаҳо
ЧАРО БАР ЗАРАРИ ХУД КОР МЕКУНЕМ?
Нағз дар хотир дорам, ки пеш аз истиқлолият, яъне замони шӯравӣ хонандагони мактабҳои таҳсилоти миёнаи умумӣ чор ё панҷ сол галстук мебастанду халос. Ҳамин ки ба сафи комсомол, ё худ Созмони ҷавонон дохил мешуданд, бо галстуки пионерӣ (пешоҳангӣ) падруд мегуфтанд. Донишҷӯёни муассисаҳои таҳсилоти миёнаи касбӣ ва олии касбӣ галстук намебастанд. Мурод ин аст, ки бастани он дар вақти дарс ҳатмӣ набуд, агарчи харидану бастани онро ба меъёр ҳам табдил медоданд, мамлакат зарар намедид. Чунки онро истеҳсол мекард, аз хориҷи кишвар ворид намесохт. Ҳоло бастани галстук дар тамоми зинаҳои таҳсилот ба ҳукми зарурӣ даромадааст. Хонандаву донишҷӯ ҳатман бояд онро банданд. Агар 2 миллион донишҷӯю хонанда, ҳол он ки шумораи онҳо хеле зиёд мебошанд, ҳатто ба қимати 5 сомонӣ барои худ галстук бихаранд, 10 миллион сомониро ташкил медиҳад. Намедонам, иқтисоддонҳо сари кадом масъалаҳо меандешанд. Чаро дар ин маврид изҳори андеша намекунанд? Ин миқдор пули кам нест. Он аз кишвар хориҷ мешавад. Фикр мекунам, беҳтар мебуд, бо ин зарар аз баҳри галстук бибароем. Он ба фарҳанги миллии мо ҳам иртиботе надорад. Ва ё истеҳсоли онро дар дохили кишвар ба роҳ бимонем ва дар он ҳатман рамзи кишвари мо таҷассум биёбад.
М.РАСУЛОВ,
шаҳри Чкалов
Баёни ақида (0) Санаи нашр: 6.01.2015 №: 3 Мутолиа карданд: 1727
