маориф
ИНТЕРНАТИ НАЗДИМАКТАБӢ – ВАСИЛАИ ДАСТРАСӢ БА ТАҲСИЛ
Дар интернати наздимактабии рақами 1 - и ноҳияи Рашт 121 нафар хонанда таҳсил мекунад. Давлат Шарифов, директори интернат, иброз дошт, ки он ҳудуди 20 сол аз фаъолият монда, хобгоҳҳояш тамоман хароб шуда буданд.
Соли 2011 бинои интернат аз ҳисоби буҷети маҳаллӣ аз нав сохта шуд ва он чор сол боз фаъолият дорад. Хобгоҳҳои интернат дорои системаи гармидиҳӣ ва ҳаммоми замонавӣ мебошанд. Хонандагон аз деҳаҳои дурдаст баъди хатми муассисаҳои таҳсилоти ибтидоӣ ва миёнаи асосӣ ба ин ҷо ҷалб мегарданд. Талабагон дар як рӯз се вақт бо хӯрок таъмин карда мешаванд, ки он асосан аз ҳисоби буҷети маҳаллист. Соҳибкорону волидон низ маҳсулоти кишоварзӣ меоранд. Сарпарасти интернати мазкур бахши суғуртаи иҷтимоӣ ва нафақаи назди мақомоти иҷроияи маҳаллии ҳокимияти давлатии ноҳия аст.
Сайриддин Холиқов, хонандаи синфи 11 аз деҳаи Шолеи Ҷамоати деҳоти Меҳнат, Сорбони Ҷиёншо, Суҳробҷони Муродалӣ, хонандагони синфи 10 аз деҳаи Даҳана ва Алишер Пирумшоев, хонандаи синфи 9 аз деҳаи Шӯхон, иброз доштанд, ки дар интернати наздимактабӣ шароити мусоид барои таълиму тарбия ва зиндагӣ муҳайёст. Онҳо ният доранд, ки баъди хатми муассиса ба донишгоҳҳои олии кишвар дохил шаванд ва таҳсилашонро давом диҳанд.
Воқеан, таъсиси чунин муассисаҳо дар ноҳияҳои дурдасти мамлакат хеле бамаврид аст. Зеро на дар ҳамаи деҳоти Тоҷикистон муассисаҳои таҳсилоти миёнаи умумӣ ва асосӣ вуҷуд доранд.
Интернатҳои наздимактабӣ мушкилоти идомаи тадриси хонандагонро дар деҳот ҳал менамоянд.
Мунаввари САФАР,
«Ҷумҳурият»
Баёни ақида (0) Санаи нашр: 16.01.15 №: 11 Мутолиа карданд: 5456
