маориф
НИЗОМИ КРЕДИТИИ ТАҲСИЛ ПУРРА ҶОРӢ ГАРДИД
Амонулло Салимов, ректори Донишгоҳи аграрии Тоҷикистон ба номи Шириншо Шоҳтемур, таъйид кард, ки дар донишгоҳ низоми кредитии таҳсил пурра ҷорӣ гардид.
Раёсати донишгоҳ барои ворид гардидан ба фазои ягона ва меъёрҳои байналмилалии таҳсилот тамоми имкониятҳоро истифода менамояд.
Назар ба гуфтаи ректор, айни замон 7851 донишҷӯ дар шуъбаҳои рӯзона ва ғоибона аз рӯи 38 ихтисос ба таҳсил фаро гирифта шудаанд. Таълими донишҷӯён аз рӯи 29 барномаи бакалавр, 9 барномаи мутахассис ва 28 барномаи магистр ба роҳ монда шудааст.
Барои кор дар истеҳсолот 92 дарсади хатмкунандагони гурӯҳҳои буҷавӣ, хоса факултети тиббӣ - ветеринарӣ ба донишгоҳ дархост овардаанд. Ин далел аст, ки хатмкунандагони муассиса дар бозори меҳнат мавқеи хос доранд.
Бино ба иттилои Амонулло Салимов, дар соли 2014 олимону омӯзгорони донишгоҳ 35 китоб, 130 дастури дарсӣ, 8 монография, 430 мақолаи илмӣ ба табъ расонданд.
Саидалӣ Гулов, Зикриё Ҳайдаров, Баҳром Аҳмадов, деканҳои факултаҳои «Агробизнес», агрономӣ ва механиконии кишоварзӣ ба пурсишҳои хабарнигорон оид ба ташкили боғҳои интенсивӣ, навъҳои нави пахта ва дастовардҳои олимону омӯзгорон посух доданд.
М. САФАР
Баёни ақида (0) Санаи нашр: 20.01.15 №: 13 Мутолиа карданд: 5649
