маориф
ҲАРФИ СОЗАНДА
Эҳдо ба рӯзномаи «Ҷумҳурият»
Беҳтарин дилномаи аҳли назар,
Ҳарфи ту ҳалномаи фатҳу зафар.
Солҳо бо нангу ори тоҷикӣ
Раҳнавардӣ сӯйи хуршеду қамар.
Дар замони рушди истиқлолият
Ту ба ҳар як тоҷик астӣ ҳамсафар.
Парчамат номуси миллат буду ҳаст,
Ин туӣ қомуси миллат мухтасар.
Сар ба сар созанда бошад ҳарфи ту,
Мекунад он халқро созандатар.
Ҳашт милён тоҷики озодаро
Мебиёрӣ муждаи субҳи саҳар.
Аз ватандории ҳар меҳанпараст
Мерасонӣ бар ҳама дунё хабар.
Дар миёни пиру барно, хосу ом
Дар билоди Тоҷикистон муътабар.
Саҳфаҳоят пур зи користони халқ,
Панди ту болотар аз панди падар.
Гуфтаӣ, ки Тоҷикистон хурд нест,
Оре, аз тангии дилҳо алҳазар!
Сулҳу ваҳдат пояи ҳастии мост,
Аз бақои тоҷиконӣ бохабар.
Сарҳади меҳру вафои мо Ватан
Ҳамраҳи ту миллатам шукронагар.
Дидаи бедори мо «Ҷумҳурият»
Бо маводу мабдаҳоят хушназар.
Ростин ҳарфу ҳиҷоҳои туро
Бишнавад душман, шавад осемасар.
Ту қаноти шоҳи бедори манӣ,
Ӯ бувад бар миллати ман шаҳписар.
Дар ҳама давру замон бар халқи ман
Нест пайке аз ту беҳ дар баҳру бар.
Тоҷикистонро зи тиру теғи даҳр
Бо сухан будиву ҳастӣ чун сипар.
Дар забони чун асал ширини ту
Дидаам ангезаҳое аз шакар.
Дар паноҳи миллати овозадор
Шод зӣ бо файзу килки пурсамар.
Бар фарози сад равонӣ аз навад
Ҷовидон монӣ ҷавон, пиронасар!
Бобоҷони НУРЗОД
Баёни ақида (0) Санаи нашр: 23.01.15 №: 16 Мутолиа карданд: 5478
