маориф
ТАДБИР МЕАНДЕШАНД
- Раёсати Донишкадаи соҳибкорӣ ва хизмати Тоҷикистон нақшаҳои иловагӣ тартиб дода, маҷмӯи корҳои ташкилӣ ва илмӣ-методиро баҳри пешрафти таълиму тарбия, баланд бардоштани сифати таҳсилот, тадқиқоти илмӣ, омодасозии кадрҳои баландихтисос, ҷалби донишҷӯён ба корҳои инноватсионӣ ва ободониву созандагӣ васеътар ба роҳ монд, - гуфт ректори донишкада Диловар Қодиров.
Ба гуфтаи ӯ сохтори ташкилӣ-идоракунии донишкада таҷдиди назар шуда, он аз аттестатсияи давлатӣ бомуваффақият гузашт. Инчунин олимон ва устодон дар омодасозии дастуру воситаҳои таълимӣ саҳми назаррас гузоштанд. Бо ҷидду ҷаҳди онҳо 16 монографияи илмӣ, 7 китоби дарсӣ, 42 дастури методӣ, 60 воситаи таълимӣ, 423 мақолаи илмӣ, дар маҷмӯъ 588 номгӯйи мавод аз чоп баромад. Донишкада татбиқи лоиҳаҳои «Роҳу усулҳои такмили тарбияи мутахассисони соҳаи туризм дар Ҷумҳурии Тоҷикистон» ва «Зарурати баландбардории маърифати молиявии аҳолӣ»-ро ба уҳда гирифтааст, ки аз буҷети давлатӣ маблағгузорӣ мешаванд.
Ба пурсиши хабарнигори рӯзнома дар бобати вазъи қабули довталабон ба донишкада аз тариқи имтиҳоноти мутамарказонида дар Маркази миллии тестӣ Д. Қодиров посух дод, ки «мутаассифона, ба ҷойи 805 нафар ҳамагӣ 343 довталаб сазовори номи донишҷӯ шуданд ва ин ба 40 фоизи нақша баробар аст. Ин омил боиси хеле кам ворид шудани маблағи шартномавӣ ба суратҳисоби донишкада гардида, муҷиби ихтисори 11 мутахассис гардид. Вобаста ба роҳҳои ҳалли ин мушкилот дар соли таҳсили оянда донишгоҳ тадбир хоҳад андешид».
Э. НАЗАРОВ
Баёни ақида (0) Санаи нашр: 23.01.15 №: 16 Мутолиа карданд: 5511
